Ni 11.3.2016, Zirtawpni khan Thingsulthiah, Tlangnuam-a kum 2014-a sak tan ‘Pig Multiplication Farm’ chu A.H & Vety Department Minister Pu C.Ngunlianchunga’n a hawng a, Farm enkawl dan tur kaihhruaina lehkhabu a tlangzarh bawk.
Minister chuan, Mizote’n Vawk sa kan ngainat ang hu hian kan intodelh lo hle a, phai lam atang leh Myanmar lam atangin vawk note leh vawk talh tur nasa taka lak luh a ngai a, a thlawnin state pawn lamah sum tam tak a luangral chhuak reng chu ui-awm a tih thu sawiin, heng sum luang chhuak venna leh ti reh tur hian NLUP sum leh RKVY hmangin hma lak a ni a, vawk sa, vawk talh tur leh vawk note pawh rei lo te ah kan in todelh thuai beisei a ni, a ti a, vawk talh tur leh vawk note-a kan intodelh chuan ram pawn lama kan sum luangral te kan hum thei dawn a, hei hian kan economy-ah nasa takin rah tha a chhuah dawn a ni, a ti.
Minister chuan, he farm hlawhtlin nan hian a thawktute an pawimawh rualin uluk taka enkawl a ngaih avangin tualchhung mite pawhin nasa taka he farm hlawhtlinna turah hian mawhphurhna an nei, a ti a, thawhrimna tel lo chuan he farm hi a hlawhchham ang, a ti bawk.
Pu Ngunlianchunga chuan, Tanhril-ah Ar note tihpunna leh ran chaw siamna hlawhtling taka bun a ni a, Tanhrilah tho hian cheng nuai 400 sengin ranchaw siamna changkang leh rintlak tak bun belh mek anih thu leh Lawngtlai-ah Social welfare tanpuina in Ar note tihpunna hmun siam a nih thu a sawi bawk.
He multiplication Farm hi RKVY sum (2013-2014 ACA) cheng nuai 475 hmanga din a ni a, kum 2014 khan sak tan a ni a, Power department-in a hranpain he farm chawmtu tur bik (transformer) 65KVA leh tui lakna tur 30KVA power an dah sak bawk.
Vawk pui 200 vulhna tur in Pali (4) a awm a, hengah hian vawk pui tur vulhna, vawkpui rai lai, no nei tawh dahna, vawk dam lo enkawlna tur hmun, vawk note dahna bakah a chi thlahtu tur vawkpa vulhna tur bik te a hranin fel taka siam a ni. Tunah hian vawk pui vawk thum atanga tanin kumin chhung ngeia vawkpui 200 dah hman tura ruahman a ni a, he farm atang hian kum tin vawk note 4000 thar chhuah theih tura ruahman a ni.
Vawk in sak dan hi Cage system ni lovin group housing (pen) a ni a, a chhuat phah atan Cast Iron hman a ni a. vawk ek leh zun fel fai taka then theih bakah vawk pawh awlsam taka silfai theih a ni ang. Vawk zun leh ek te hi mumal taka paih a, enkawl zui a nih theih nan Drainage system tha tak siam a nih bakah vawk ek atangin Bio-gas siam tura ruahman a ni bawk.
He farm hi ama sum thawhchhuah hmanga inenkawl tura duan a ni a, Monitoring committee din a ni a, anni hian a tul angin ‘Farm Management board’ hnenah ruahmanna leh in enkawl dan tur mawhphurhna hi an la dawn a ni.
He farm hawnna inkhawm hi Pu K.Lalnghinglova, IAS, Commissioner & Secretary, A.H & Vety department chuan a kai hruai a, Dr. Saingura Sailo, Director, A.H &Vety chuan he farm hlawhtling taka a awm theih nana hmalak dan report a pe bawk.
