Vawiin khan Industries Minister Pu H.Rohluna chuan Vanapa Hall-ah Hnamchhantu Pawl buatsaih Handicrafts Exhibition a hawng.

Khuallian Pu H.Rohluna chuan Mizote’n thing leh mau atanga thil siam (handicraft) lamah hma kan sawn thu sawiin, kan talent erawh kan la pho chhuak tam lo, a ti a. Chuti ang inpho chhuahna tur hun leh hmun Hnamchhantu Pawlin an buatsaih thin chu lawmawm a tih thu sawiin, Exhibition-a telte chu ram hmasawn nana thawktu leh ei tling ni turin duhsakna a hlan nghal bawk. Thing, mau, changel leh thil dang hmanga thil siam kawngah hma sawnna tur tam tak a la awm a; chumi atan chuan Industries Department pawhin Project siama hma lak zel a tum a ni tiin, Khuallian chuan hma sawn zel tura kut themthiamte leh Department thawh ho dan thiam a tul thu leh mipuite paw’n mahni ram chhunga thil siamte an hlut thiam deuh deuh a pawimawh thu a sawi bawk.

He Handicrafts Exhibition hi National Agro-Forestry & Bamboo Mission hnuaia Bamboo Development Agency-in a sponsor a ni a. Hawnnaah hian Mizoram Khadi & Village Industries Board Chief Executive Officer Pu Kaisangzuala chu Khual Zahawm a ni.

He Exhibition-ah hian dawr 22-ah thil siam chhuah chi hrang hrang 60 chuang pho chhuah a ni a. March ni 19, 2016 thleng tlawh theih a ni ang.