1425/2023-2024

Aizawl, the 9th August, 2023: A.H & Vety. Department leh Mizoram Livestock Development Board-te tangkawp buatsaih, ni thum (August 9-11, 2023) awh tur Bawng kai rai dan chungchang inzirtirna, 'Refresher-Cum-Short Course Training on Artificial Insemination (AI) in Cattle' chu vawiin chawhma khan A.H & Vety. Minister Er. Lalrinawma chuan Veterinary Polyclinic Hospital Conference Hall, Khatla-ah khuallian niin a hawng.

Khuallian Er. Lalrinawma chuan thu sawiin, khawvel thang zelah mihring kan pung zela, ei leh bar mamawh sang chho ve zel avanga harsatna thleng theite tunlai thiamna, hlawk zawka ei leh bar thar chhuah theihna hmangtea kan lo dawnsawn thiam a tul a ni, a ti a. Tunlai thiamna technology tha tak takte a nihna ang taka chhawr tangkai thei turin a enkawl dan dik leh felfai neih hmasak a tul thu sawiin, mihring punna leh eitur punnate chu a inkungkaih tlat avangin a inkhuangrual theih nana tanlak chu thil tih makmawh tak a ni, a ti bawk.

Mihring mamawh ei leh bar dehchhuah kawnga A.H & Vety Department hnathawh chu ropui a tih thu leh thawktute inpekna leh thahnemngaihna fakawm a tih thu a sawi a. Tunlai thiamnate banphak ve zel thei tura intuaithar peih a pawimawh thu pawh sawiin, District hrang hrang atanga training chhim tura Vety Doctor kalkhawmte chu training hlawkthlak tak hmang theuh turin duhsakna a hlan a. An thil zir leh thiamnate District hrang hranga pu darh tur leh Mizoram sum leh pai dinhmun chawisang theitu tur a ni tih hriaa, mipuite bawng chi tha leh thar hlawk zawk chhawpchhuah sak thei tura ngaihtuahna seng chhunzawm zel turin a chah bawk.

Training hawnna hun hi A.H & Vety. Department Secretary Pi Lalzarmawii IAS chuan kaihruaiin kalkhawmte lawmna thu a sawi a. Dr. Lalrinpuii Sailo, Director, A.H & Vety. Department-in training buatsaih chhante a sawifiah a. Dr. RL. Tanpuii, Addl. Director (AH&DD) in lawmthu sawiin training hawnna hun hman hi a khar a ni.

Hemi hnu hian ni thum awh tur Bawng kah rai dan chungchang inzirtirna training neih chhunzawm nghal a ni a. Dr. F.Laltanpuia, Dy. Director (Cattle & Mithun Development) training neih dan tur tlangpuite a sawifiah hnuah resource person tura ruat Dr. Lalhmangaiha, Dy. Director (Feed & Fodder Development), Dr. H.Lalzarliana, Manager, RPBF Selesih, Dr. MS. Dawngliana, VO North Vanlaiphai leh Dr. K. Lalchhanhima, VO (MVU) Aizawlte'n topic hrang hrang hmangin zirtirna an pe a; training chhung hian field visit leh practical training-te pawh neih a ni bawk ang.

He training program hi December 2014 atanga kalpui tan Rashtriya Gokul Mission (RGM) hnuaia peng pawimawh tak National Artificial Insemination Programme (NAIP) hnuaia ruahman a ni a. Ram chhunga Bawng vulhte humhalh leh bawnghnute tam zawk an dehchhuah theih nana ruahman niin, hemi atana pawimawh tak Bawng chi tha hmanga Bawng kah rai (Artificial Insemination) uar zawka kalpui leh hemi kaltlanga bawng chi tha, hnute tam leh sum lakluh ti pung thei tura tanlak chu a tum pawimawh tak a ni.

NAIP Phase 1-3 hi kum 2019-2022 chhung khan kalpui niin, Phase 3 bikah hian Mizoram chuan target a khum a ni. NAIP Phase 4 hmalakna kum 2023 July thla zawh ruala tawp mai tawh tur chu thla hnih chhung atan pawhsei leh niin, NAIP Phase 4 hnuaia Mizorama Artificial Insemination tih zat 72% chu hemi hun chhung hian 80% chunglam  thlen theih beisei a ni. Heng bakah hian NAIP Phase 5 kalpui leh beisei niin hemi inpuahchah nan hian training hi buatsaih a ni a, practical neihna tur hmun CBF Selesiha Artificial Insemination Training Centre hi Sawrkar laipui chuan kum 2020 khan Artificial Insemination Training nana hman tlak a ni tih pawmpuina accreditation a pe a ni.