1426/2023-2024

Dated Aizawl, the 9th August, 2023: Vawiin khan Chief Minister Pu Zoramthanga chuan a pisaah tun hnaia Commonwealth Weightlifting Championship, 2023; Gautam Buddha University, Greater Noida a buatsaiha 81 Kg Youth Category a Gold Medal dawngtu Lalruatfela, Bungzung hnenah lawmpuina a hlan.

Chief Minister chuan, intihsiakna hautak tak mai a hnehna chang thei Mizoramin kan nei chu lawmawm a tih thu hrilhin a kal zelna turah duhsakna a hlan a. Mizoram leh India ram tihmingthatu infiammi entawn tlak nih tum tlat turin a chah a ni. Tun hnaiah Mizo thalaiten infiamna huang hrang hrangah hlawhtlinna duhawm tak tak an chang zel hian rilru a tihlim hle a, covid19 hripuiin min chim vanga harsatna tam tak karah kan thalai infiammiten hma lam an pan zel mai tih hriat hi a nuam em em a ni, a ti bawk.

Lalruatfela, Pu Lallawmawma, Bungzung fapa hian kum 2019 khan Mizoram Weightlifting Academy zawmin Mizoram State Sports Council Coach Pu Zohmangaiha hnuaiah a inzira, kum 2023 April kha National Centre of Excellence, Patiala, Punjab ah training tura thlan a ni. Kumin July ni 12-16 chhunga Commonwealth Championship buatsaihah hian 81kg Youth Category ah Lalruatfela hian Snatch 1st attempt ah 121 kg zovin 2nd attempt ah 125 kg a zo leh a; 3rd attempt ah 128 kg zo ta thung.

Clean and Jerk ah 1st attempt 148 kg zovin 2nd attempt ah 155 kg zo lova in 3rd attempt ah 155 kg zovin total-ah 280 kg a chawi a, Gold a la ta a ni.

Lalruatfela hi Mizoram Weightlifting Association hruaituten an tawiawm a ni.