3482/2023-2024

Aizawl, the 24th January, 2024: Animal Husbandry & Veterinary (AH&Vety) Minister Pu C. Lalsawivunga chuan vawiin khan Department hmalakna hrang hrang Animal Feed Plant, Ramrikawn; Zoram Poultry Development Societies (ZPDS) Hatchery Farm, Tanhril; Boar Semen Station, Lawngzawl, Lengpui leh Feed Godown & Feed Plant, Lengpui-te tlawhin hmalakna leh hmachhawpte a enfiah.

AH& Vety Minister Pu C. Lalsawivunga chuan ran chaw siam chhuah nana hmanraw mamawh zinga mi Vaimim leh Bekang bakah mamawh dangte pawh phai lam atanga chawlut lova khawtual thar ngeite rate mumal leh man man zawka lei a nih theih nan ngaihtuahna sen a tul thu sawiin, hengte hi Mizoramah ngei tha taka thar chhuah theih a nih avangin Support Price mumal tak siama hma lak a tul thu leh zirchianna pawh kalpui mek a nih thu a sawi a. Sa, Artui leh Bawnghnute tam zawk thar chhuak turin ran chaw tha leh man man taka hralh tur mamawh khawp siam chhuah a ngaih thu sawiin, thawktute chu ran chaw quality tha leh hrisel zawk siam chhuah kawngah theihtawp chhuah chhunzawm zel turin a chah bawk.

A.H&Vety. Department hmalakna leh thlen chinte chu hriat nuam leh lawmawm a tih thu sawiin, ZPDS Hatchery Farm Tanhril hmalakna chhuanawm tiin, tun aia hmasawn lehzual tura theihtawp chhuah chhunzawm zel a tul thu a sawi a. Phai lam atanga Artui, Arsa leh Bawnghnute lakluh avanga cheng tam tak State pawna luang ral thin chu intodelhna hmanga pumpelh a nih theihna tura tanlak tlan dan tur kawng zawnho zel chu vei tlan a pawimawh thu a sawi a. Intodelh turin eng ti kawng zawng pawha hmalak a tul thu leh kawng awm thei ang angte dap tlan a tul thu sawiin, hemi kawnga tuimi, tih takzeta hmalatute leh entrepreneur-te thlenga thawhhopui bakah bultansak thlenga ngaihtuah tel a tul thu a sawi bawk.

Vawiina AH & Vety Minister-in a tlawh Animal Feed Plant, Ramrikawn-ah hian Feed Plant pahnih awmin a hmasa zawk hi NLCPR sum cheng vaibelchhe 4.36 hmangin kum 2002 khan din a ni a, nikhata ran chaw Ton 50 her thei tura duan a ni a. Feed Plant pahnihna hi NABARD RIDF XX sum cheng nuai 523.53 sengin kum 2016 khan din a ni a, darkar khata ran chaw Ton 8 her thei tura duan a ni. Heng hmangte hian a tlangpuiin nikhatah ran chaw quintal 50-100 her thin a ni a, Ar chaw, Vawk chaw leh Bawng chaw te siam chhuah niin din a nih atanga tun thlengin Ar chaw quintal 76775, Vawk chaw quintal 65934 leh Bawng chaw quintal 55646, avaiin ran chaw quintal 198355 her chhuah tawh a ni. Commercial feed dang aia tlawm zawkin mipui hnena zawrh chhuah thin a ni. Ran chaw quality tha leh thar lam tlawm zawka siam chhuah te, Mizoramin ran chaw siamna tura hmanrua (raw material) kan neih favai man man taka hralhna siam leh vaimin chin chawisan bakah comercial feed-te rate mumal taka khuahkhirh chu a tum langsarte an ni.

Arsa leh Artuia intodelh a nih theihna tura kum 1987 a din, Regional Broiler Chick Farm (RBCF) chu kum 2013-2014 khan tih changtlun niin, Zoram Poultry Development Society INDBRO Poultry Hatchery Farm Tanhril tih a ni a. ZPDS INDBRO Hatchery Farm Tanhril tihlen leh  tihchangtlun hna hi NABARD RIDF-XXVI (2020-2021) sum cheng nuai 533.76 sengin 'Augmentation of Zoram Poultry Development Society's INDBRO Poultry Hatchery Farm, Tanhril' tih project hmangin building sak belh bakah hmanraw hrang hrang lei a ni a. Special Assistance to State for Capital Expenditure, SASCE (2021-2022) sum cheng nuai 445 sengin 'Upgradation of INDBRO Hatchery Farm for Zoram Poultry Development Society at Tanhril' tih project thawh a ni a, a ruhrel awmsa tihchangtlun kawnga pawimawh hrang hrangte thawh a ni a. Heng bakah hian Hatchery thar te, Staff Quarters thar te, Rainwater Harvesting Tank te, 30 KwP Solar Roof top leh tul dangte chu heng project atangte hian siam a ni.

ZPDS Hatchery Farm hi North-East a Breeding farm awm chhun niin breeder bikah chuan INDBRO Brown Layer leh INDBRO Rainbow Rooster-te enkawl an ni a. He farm hiam thiamna changkang Ar kahrai (Artificial Insemination), Cage system, Automatic drinking system leh Hatchery changkang tak, Setting Machine Artui 3,00,000/- (Nuai thum) leng leh Hatching Machine kar khata Arte 1,00,000/- (Nuai khat) awp keu theite a thuam a ni. Mipui rawngbawl tura hawn a nih May ni 18, 2015 atanga tun hun thlengin he farm hian Artui 26,72,302 leh Arte 19,31,984 a thar chhuak tawh a, Sawrkar-ah chhiah Rs.32,85,679.89 a chhung lut tawh bawk a ni. ZPDS Hatchery Farm hian Rainbow Rooster tharte mipui hnenah a hralh bakah A.H&Vety Department project hrang hrang RKVY, FOCUS leh NLM atante a thar chhuak bawk a. A.H&Vety Department farm hrang hrang leh mimal layer vulhte tan Brown Layer a pe chhuak bawk.

Pu C. Lalsawivunga chuan Sawrkar laipui hnuaia National Livestock Mission (NLM) project atanga kalpui Vawkpa chi sawngbawlna tura ruahman Boar Semen Station, Lawngzawl, Lengpui pawh tlawhin hmalak tawh chinte a enfiah a. Riverine Forest Reserve huamchhunga awm a nih avanga project-in harsatna a tawhte bakah kalpui zel tura sum mamawh leh tulte pawh sawiho niin, Department hotute hnen atangin forest clearance nei tura hmalak mek a nih thu ngaihthlak a ni bawk.

AH & Vety Minister chuan Department kaltlanga project kalpui mekte hluihlawn mai lova tihlawhtling tura fund awm ang angte dap khawma puitlin tum a tul thu sawiin, Boar Semen Station panna kawng leh ruhrel pawimawh tul dangte din tura ngaihtuahna sen tlan a tul thu a sawi bawk.

Vawiin vek khan Lengpui rama Feed Godown & Feed Plant siam mek pawh Minister chuan tlawhin hna thawktute chu hun bituk chhung ngeia ram tana rotling leh chhawr tangkai tlak hmasawnna ruhrel siam tum turin a chah a. He project hnuaiah hian SASCE sum cheng nuai 465 hmangin 'Sustainable Animal Feed Distribution to Check Inflation of Meat and its end Product' tih project bakah RIDF-XXVIII (NABARD Loan) sum cheng nuai 744 hmangin 'Establishment of Animal Feed Plant at Lengpui' tih project chu thawh mek a ni.

AH & Vety Department hmunhma pawimawh hrang hrangte tlawhnaah hian a enkawl tura ruat Officer-te'n hmalak dan tlangpui leh hmachhawpte Minister hnenah hian lo hrilhin, Animal Feed Plant, Ramrikawn leh ZPDS Hatchery Farm, Tanhril te chu thawhchhuah atanga mahni inenkawl, revolving fund hmanga chhawmnun a nih thu leh intunnunna tur ngaihtuah chungin man man thei ang bera thil dehchhuahte mipui hnena hralh thin a nih dante an hrilh a. Hmasawn zel nana pawimawh an tih leh rawtna an neihte an lo thlen bawk a, inrawntlanna hun hlawk thlak tak neih a ni.

Minister Pu C. Lalsawivunga hi A.H & Vety Department atangin Secretary Pi Lalzarmawii, Director Dr. C. Lalrintluanga, Jt. Director (Planning & Monitoring) Dr. C. Zarzokima leh Department Officer dangte'n an tawiawm a ni.