Vawiin chawhma dar 10:30 khan Feed Mill, Selesih Farm ah Pu C. Ngunlianchunga, AH & Vety Minister in chaff cutter (bawngchaw channa khawl) mi 20 hnenah a pe chhuak.Heng chaff cutter dawngtute hi NLUP hnuaia bawng lian dawngtute an niin a dang zawng chu Vety Farm a hman turin pek chhuah a ni.

Minister chuan bawngchaw channa hi Mizoram bawng vulhtuten an hman vawi khatna tur a nih thu sawiin state changkang zawkah chuan an bawngchaw te chu uluk takin khawl hmangin an chan sawm vek a, bawng tan pawh ei a awlsam in an hnute pawh a tam phah a ni a ti a. Bawng chaw tur hnim hring 90 % chu ran hian a ei thei tawh dawn a paih a awm tawh lovang tiin khawl thar in kil a dah mai mai lovin hmang tangkai turin a ngen a. Vety Department in hma a sawnna turah a te ber atanga a lian ber thleng in awl lova thawk turin Vety Department a thawktu leh farmer te chu rilru nei taka ram leh hnam tan a thawk turin Minister chuan a sawm a ni.

Pu Ngunlianchunga chuan NLUP thlangtute hi khawpui chhunga mi chauh an ni lova, thingtlang khaw kel tak takah te pawh an awm avangin bawng kahraina programme in a thlen phak lohna khua te ala awm avangin bawng chi thlahtu tur bawngpa ngaihtuahsak a ni a. National Programme on Bovine Breeding and Dairy (NPBBD) hnuaiah bawngpa te hi lei a ni a. Tun tumah hian bawngpa tuai 28 Orissa atanga lei a ni. Nikum mai khan hetiang bawk hian bawngpa engemaw zat chu sem a lo ni tawh nghe nghe a ni a ti.

Pu K. Lalnghinglova, IAS, Commissioner & Secretary, AH & Vety chuan Department tangrualna ah AH & Vety chu fakin he department tel lo hian state hrang hrang pawh an awm thei lo tiin Vety Products hi chhungtin ah a pawimawhna a sawi a. Minister in pek zawhna avangin nasa zawka department in hma a sawn zel a beisei thu a sawi bawk.

Dr. L.B. Sailo, Director, AH & Vety chuan lawm thu sawiin ran chaw zaina chu thil te tak te ang a lang mahse a hmangtu tur atan ropui tak si a ni tiin lawmthu sawi chungin khawl hman dan tur pawh a dawngtu tur te pawh zirtir nghal an ni.