Vawiin khan Mizoram Milk Producers’ Co-operative Union (MULCO Ltd) chuan YMA Hall Thuampui-ah an Annual General Meeting (AGM) vawi-18 na an nei a, AH & Vety Minister Pu Nihar Kanti Chakma’n a hmanpui a ni. AGM chawhma session hi Pu Vanlalchhunga, Chairman MULCO Ltd in kaihruaiin Pastor Vansawma Thuampui Pastor Bialtu chuan hunserh a hmang a.
Pu Nihar Kanti Chakma chuan AH & Vety. Department leh MULCO hian inzawmna tha tak an nei a, an thawhhona ti chak lehzual turin Sorkarin hma a lak zel tur thu a sawi. Sorkar in ranvulhtu a bikin bawngvulhtute hamthatna ngaihtuah chungin kawng tinrengah MULCO thuamthat leh puih a tum zel bawk a ni a ti a. Minister chuan ranvulhtu kalkhawm te chu thahnemngai taka thawhrimna, taimakna, tumruhna leh rinawmna nena tan la turin a fuih a ni. Sorkar Flagship Programme NLUP hnuaia bawngvulh thlang an tam chu lawmawm a tih rualin tunhnaia ran thi awm chu pawi a tih thu a sawi.
Dr. Lalhmingthanga, Managing Director, MULCO Ltd chuan kum 2011-2012 chhunga MULCO Ltd Annual Report a pe a. Report a pek ah hian Managing Director chuan MULCO hnathawh dante, sum dinhmun te, an inrelbawl dan te, Primary Society an puih dan te leh MULCO tihchangtlun nan hma an lak tum dan te chipchiar takin a tarlang tel bawk a ni.
MULCO Ltd hi Mizoram Co-operative Societies Act hnuaia June ni 5, 1984 khan register a ni a. Tunah hian MULCO hnuaiah affiliated functional society 39 awmin an zingah Society 23 chuan MULCO a bawnghnute an chhung mek a ni. Society hrang hrang hnuaia society member 674 an awm bawk a ni. Heng Society atang te hian kum 2011-2012 chhung khan MULCO chuan bawnghnute litres 24,33,975 an lei a. Hemi hun chhunga an Business Turnover chu cheng nuai 965.58 niin an Net Profit(Provisional) chu cheng nuai 25.30 a ni. Kum 2010-2011 chhung khan an Net Profit (Audited) hi cheng nuai 16,49,707. 45 niin an Business Turnover chu cheng nuai 1051 a ni thung.
MULCO ah hian Board of Director member 9 an awm a, 5 te hi affiliated society(B Class) hrang hrang Chairman atanga thlan an ni a, member dang 4 chu Sorkarin a ruat an ni. NLUP Infrastructure Development hnuaiah MULCO Dairy Plant tihlenna turin tun thla hian khawl chi hrang hrang leh hmanrua an dawng a. Chungte chu Road Milk Tanker 5000KL – pakhat ; Milk Silo 5000KL – pakhat; Pouch filling machine – pakhat; Milk can(40 litres) – 100 ; Milk Crates – 1000 leh Insulated Boxes(25 litres) – 80 te an ni.
