Mizoram Legislative Assembly Public Accounts Committee chuan vawiin khan an Chairman Pu C.Ramhluna hovin Aizaawl Civil Hospital Complex-a AYUSH building leh Central Medical Store, Zemabawk te an tlawh a, a dinhmun te a hmunah enfiahin thawktute nen inkawmhona hun an hmang.

AYUSH building chhawng thum Rs 53,68,000 /- senga sak chu ruahman (Plan & Estimate) mila sak a ni em tih te, damdawi leh hmanrua lei te leh thil dangte an inzawtfiah bawk. AYUSH ah hian Doctor 5 an awm mek a, thla tin damlo 1000 vel an enkawl thin a ni. Central Medical Store, Zemabawk hi Health Department-in Mizoram puma sem darh tur damdawi leh hmanrua te an dahkhawmna a ni a, thawktu 42 an awm mek bawk a ni.

Vawiina MLA rual PAC member kalte hi Chairman Pu C.Ramhluna, Pu B.Lalthlengliana, Pu Lalduhoma, Pu R.Lalrinawma, Pu K.Lalrinthanga leh Pu Lalrobiaka te an ni, Assembly officer thenkhat ten an tawiawm bawk.