3520/2023-2024

Aizawl, the 25th January, 2024: Vawiin khan Animal Husbandry & Veterinary Minister Pu C. Lalsawivunga chuan Sihphir, Lungdai, Serkhan leh Nisapui khuaa Vawk leh Bawng vulhtute an dinhmun hrechiang turin a hmunah kalin a tlawh a, harsatna an tawh leh an hmalak dante enfiahin a kawm.

A.H & Vety Minister Pu C. Lalsawivunga chuan kuthnathawktu Bawng leh Vawk vulha eizawngte'n harsatna hrang hrang an tawh thinte a hmunah ngei tlawha chiang zawka hriatpui tura tlawh a nih thu a sawi a. Mamawh tam tak an neihte leh ran chaw man sang zel avanga harsatna an tawh dante a hriatpui thu sawiin, Sawrkar ang zawngin vawi leh khatah an harsatnate sutkian nghal mai theih ni lo mah se, an mamawh leh harsatnate chu phuhruk a nih theih nan a theihna ang zela hmalakpui a tum thu a hrilh a ni.

Pu C. Lalsawivunga chuan kuthnathawktute chawisan leh dawmkan nana hmalak chu Sawrkar thiltum a nih thu sawiin, Pathianin min hruai anga kan inpui tawnin kan inhre tawn zel dawn a ni tiin, bawnghnute leh sa a Mizoram intodelh theih nan Sawrkar kutke pawimawh ber chu ran vulha ei zawngte hi an ni, a ti a. Taimate dinchhuahna tur leh thawkrimte dinchanna turin Sawrkarin hma a lak zel dawn thu pawh a sawi a. Ram leh hnam intodelh tura hmalak a tul thu sawiin, kuthnathawktute chu ram leh hnam tana beiseina leh innghahna an nih thu a sawi bawk.

He hunah hian ran vulhtute'n harsatna hrang hrang an tawhte Minister hnenah hian an lo thlen a. Harsatna an tawh zinga lian ber ran chaw man to zel avanga ran vulhtute'n harsatna an tawh chu a theih chen chena sutkian a nih theih nan Sawrkar lam atangin theihtawp chhuah a tum thu a sawi bawk.

Minister hi A.H & Vety. Secretary Pi Lalzarmawii  IAS, Director Dr. C. Lalrintluanga leh Department Officer dangte'n an tawiawm a ni.