3519/2023-2024

Aizawl, the 25th January, 2024: Labour, Employment, Skill Development & Entrepreneurship (LESDE) Department kaltlanga buatsaih, Industrial Training Institute (ITI) atanga zir chhuak, thiamna hmanga mahni kutkawiha ei zawn tumtute puih nana intihsiakna ‘KAWTCHHUAH - 2024' a tum 2-na (2nd Mizoram Startup Competition for Govt. ITI pass-outs), January ni 23-25, 2024 chhunga buatsaih chu vawiin khan zawhfel a ni a. A kharna hun Govt. Aizawl ITI Auditorium, ITI Venga hman chu LESDE Minister Pu Lalnghinglova Hmar chuan khuallian niin a hmanpui.

Pu Lalnghinglova Hmar chuan STRIVE kaltlanga ITI tihhmasawn nana hmanraw pawimawh bungraw hrang hrang 112, cheng nuai 44.47 man chu ITI Aizawl Principal Pu Vanlalhruaia Sailo hnenah a hlan bakah KAWTCHHUAH 2024 intihsiakna kaltlanga tithate hnenah lawmman a sem chhuah bawk a. Minister hi Mizoram Youth Commission (MYC) Chairman Pu Malsawmzuala Ralte in a tawiawm a ni.

Khuallian Pu Lalnghinglova Hmar chuan a tak taka hna thawh tum kalkhawmte zinga tel chu nuam a tih thu leh phurawm a tih thu sawiin, ITI atanga mi 4767 te'n thiamthil an zir chhuak tawh leh heng zinga 50.61% te'n eizawnna ngelnghet an nei thei chu ropui a tih thu a sawi a. Sawrkarin tih takzeta hmalatute puih a tum thu leh 'Bana Kaih' Policy a kalpui dawn thu sawiin, ITI zirlai leh zir chhuakte chu eizawnna ngelnghet nei thei tura theihtawp chhuah turin a fuih a. Hun vawng dik tur leh hnathawh nana hun tam zawk hman tum turin a chah a, hlawhtling turin midang aia danglam leh hun hmang tangkai nih a ngai a ni, a ti bawk.

LESDE Minister chuan ITI zirlaite chu eizawnna tura pawimawh thiamthil zir tura ITI a lut an ni tih hre reng tura chahin, hming ziah luh ringawta duh tawk mai lova ei hmuhna tlak thiamna zir chhuak thei tura tan la turin a chah a. Trade hrang hrang hnuaia zirlai training-te chu thawhrimna leh teirei peihna ngai pawimawh turin a chah a. Hlawhtlinna chang ta lote pawh hnual mai lova theihtawp chhuah chhunzawm zel turin a fuih bawk a. Tanpuina pawisafai dawngte chu a lawmpui thu sawiin, a taka hnathawh nana hman tangkai tum turin a fuih a. LESDE Department hnuaia inzir chhuakte chu awlsam taka sum siam tum lo tur leh thiamna tak tak hmanga eizawn tum tlat turin a fuih a. A taka hna thawktute tan Sawrkar a inhawn reng thu pawh sawiin, theihtawp chhuahtu leh hlawhtlin tumte hmalaksak an nih tur thu a sawi bawk.

KAWTCHHUAH -2024 hi Sawrkar laipui Ministry of Skill Development & Entrepreneurship (MSDE) hnuaia Skill Strengthening For Industrial Value Enhancement (STRIVE) project kaltlanga buatsaih a ni a. KAWTCHHUAH -2024 intihsiaknaah hian tel tuma hming pe lut mi 44 awmin, heng zinga mi 30 te hian intihsiakna an hmachhawn thei a. Intihsiakna hi Stage 2 ah then niin, thiamthil neih leh an thiam dan chin (Skill Competency Test) leh a taka eizawnna an kalpui dan tura ruahmanna an siam (Business Plan) te Panel Member-te'n an endik a. Endikna atanga ti tha thlanchhuah mi 15 te hnenah Citation leh lawmman pawisafai Rs. 1,00,000/- (nuai khat) theuh sem niin avaiin Rs. 15,00,000/- (nuai sawm panga) sem chhuah a ni. Lawmmante hi khuallian LESDE Minister Pu Lalnghinglova Hmar chuan a hlan a, Department-in training pein an hmalaknate uluk takin a vil zui dawn bawk a ni.

KAWTCHHUAH 2024 RESULT

(2^nd MIZORAM STARTUP COMPETITION FOR ITI PASS-OUTS)

STRIVE hnuaiah hian Component hrang hrang awmin, chung zinga Result Area-1 hnuaiah chuan STRIVE selected ITI atan Govt. ITI Aizawl hi tehfung an ruahmannate phain a awm ve a, Institute Strategic Plan (ISP) te siamin hei hi DGT lamin pawm sakin senso atan cheng nuai 200 a dah a. Tun dinhmunah cheng nuai 114.40 release tawh niin, vawiina bungraw hlan cheng nuai 44.47 man hu tel hian avaiin cheng nuai 84.01 chu ITI tihchangtlun nan hian hman tawh a ni. STRIVE hnuaiah hian ITI enkawltu atan Institute Management Committee (IMC) din a ni a, hemi kaltlang zel hian hmalakna kalpui a ni. Vawiina bungraw hlan takte hi ITI Trade hrang hrangte zirna tur hmanrua a ni a, avaiin bungraw item 112 chu ITI zirlai te'n hmanraw tha zawk hmanga zirna an kalpui theih nan hlan a ni.

He hunah hian Pu Lalramsanga Sailo, Secretary, LESDE in kalkhawmte lawmna thu a sawi a. Pi Angela Zothanpuii, Director, LESDE Department hnen atangin report ngaihthlak a ni a. Intihsiakna endiktute aiawhin Dr. James LT Thanga, Associate Professor, MZU in endikna kalpui dan a sawifiah a. KAWTCHHUAH -2022 a lawmman dawngtute hmalakna hnuaia hlawhtlinna zinkawng video clip thlirho a ni a. Pu K. Lalhmingliana, Addl. Secretary, LESDE Department-in lawmthu sawiin hun hman a khar a ni.