3518/2023-2024

Dated Aizawl, the 25th January, 2024: Vawiin khan Chief Minister Pu Lalduhoma chuan a office-ah Pu KVSSLV Prasada Rao, General Manager, Mizoram Regional Office, NABARD chu a kawm a. Mizoramah NABARD sum hmanga hmalakna a tam avanga lawmthu hrilhin, a kaihhruai sawrkar chuan hmasawnna hnathawhna tura sum leh pai an dawn apiang dik taka an hman tur thu a hrilh.

Chief Minister hian, eng sum hnar pawh ni se, hmasawnna hnathawhna tur an hmuh apiangte chu dik taka hman a nih a, a hun taka zawh a nih zel theih nan Project Monitoring Committee chak tak an din fel tawh tih a hrilh a. Heng hmasawnna hnathawhna kan dawn thin te hi a hluin a lawmawm em em a, dik takin kan hmang ngei tur a ni, a ti. NABARD in kawng tam taka hnathawhna tur sum Mizoram sawrkar an pek avangin lawmthu a hrilh a ni.

NABARD General Manager hian, Chief Minister hi lawmpuina leh duhsakna a hlan a. An sum hmanga hnathawhte zawng zawng a hmunah an en vek thei lo tih sawiin, hna tling lo lutuk nia hriatte chu an hnenah hriattir zel se an duh tih a sawi a. Hna chhia chauh nilovin hna tihkhawtlai pawh a awm thin nia an hriat thute Chief Minister hnenah hian an thlen a ni. Mizoram sawrkarin office building tha tak an pek avangin lawmthu a sawi bawk.