3517/2023-2024

Aizawl, 25.01.2024: SCERT buatsaihin vawiin chawhnu khan Incentive Cash Award for Proficiency  in Science and Mathematics semna neih a ni a. School Education Minister Dr. Vanlalthlana chu he hunah hian khuallian a ni. SCERT Office conference hall a cash award semna hun buatsaih ah hian HSLC leh HSSLC a Science leh Mathematics subject a top-3 te hnenah lawmpuina sumfai leh memento hlan an ni a. Dr. Lalzirmawia Chhangte, Secretary, School Education Department chu khualzahawm a ni bawk.

Khuallian Minister Dr. Vanlalthlana chuan zirlaite chu an hlawhtlinna ah a lawmpuina thu sawiin, an kal zelna turah taimakna thlah lo turin leh, an thiamna ramin a mamawh tih hre reng turin a chah a. Zirlaite tiphur tura tum 46 lai mai Cash Incentive Award pek a ni ta chu lawmawm a ti a. Science leh mathematics te chu zirna peng pawimawh tak, khawvel changkanna thang zel ah ngaihpawimawh loh theihloh a nih thu a sawi. Dr. Vanlalthlana chuan Technology chak taka thang chho zel umpha turin zirlai leh zirtirtute pawh insiamrem zel thiam pawimawh a ti a. Zirlaite chu an zirna leh an hma hunah hlawhtlin tak tak an duh chuan danglam ngam turin a chah bawk. Khawtlang leh kohhran ah inhman dan tur chin tawk hriatthiam a pawimawh thu saiw bawkin, infiamna leh tui dang neih pawh a tha a, mahse mahni tum ah chiang in, chin tawk neih thiam a pawimawh a ti a ni. Minister chuan zirlai kalkhawmte chu nakin lawka ram hruaitu leh researcher pawimawh tak an la nih ngei a rin thu a sawi a, Mizoramin eng nge harsatna kan neih hriatchhuah tum tur leh, chu harsatna sutkianna tur ‘affordable, sustainable solution’ ngaihven a, hma la ngei turin a chah.

Khualzahawm Dr. Lalzirmawia Chhangte chuan hetiang hun pawimawh tak awm theih chhan chu zirlaite, zirtirtute leh nu leh pate tanrualna leh an thawhrim rah a ni a ti a, inelna sang tak khawvela cheng kan ni a, mi naran tan hna tha hmuh a har chho zel dawn a, mi naran nilo, mithiam tak tak ni tura in vawrh chhoh hi a pawimawh a ni tiin zirlaite a fuih.

Vawiin programme-ah hian HSLC-ah Science subject a zirlai 38 leh Mathematics-ah zirlai 25 ten award hlan a ni a. HSSLC-ah Mathematics, Physics, Chemistry leh Biology a ti tha zirlai 18 ten he cash award hi an dawng bawk.

School Education Director Pu lalsangliana pawhin thu sawiin, Mizoramin Sceience leh mathematics zirna kawnga hmasawnna tura hmabak tam tak a awm dan leh zirtirtu mamawh belhna awm thu a sawi. He cash award semna inkhawm hi Pi Zohmingliani, Director, SCERT in kaihruai a. SCERT Dy. Director, Pu F. Lalliansanga chuan report pe in, Joint Director Pi Caroline Zoramthangi chuan lawmthu saiwin hun a khar a ni.

He Incentive Cash Award for Proficiency in Science and Mathematics hi Science Promotion Wing (SPW), SCERT bul tum niin, kum 1978 atang khan Prof. L.N Tluanga kaihhruaina a bul tan a ni a, kum tin zirlai ti thate hnenah pek thin a lo ni ta a, kumin hi vawi 46 an semna a ni tawh a ni. Science Promotion Wing, SCERT hi kum 1973 khan Mizoram a Science leh Mathematics in hma sawn nana din a ni.