Vawiin chawhma khan Animal Husbandry & Veterinary Department buatsaih, African swine Fever natna laka kan ram a him theih nana hmalakna  “Sensitization Workshop on African Swine Fever” chu Conference Hall, Mizoram New Capital Complex, Aizawlah neih a ni a, Dr K Beichhua, Minister AH & Veterinary department in he hun hi kaihruaiin Dr Lalnuntluanga Colney, Joint Director in African Swine Fever chungchangah zirtirna a pe a ni.

Minister Dr K Beichhua chuan,” African Swine Fever, vawk natna chu vaccine awmlo leh darh chak em em, ram economy pawh nasa taka nghawng chhe thei a ni a, kan ram thenawmahte pawh vawk vulhtute tan harsatna nasa tak a thlen mek ni a hriat a ni,’ a ti a,’ He natna hi kan ram chhunga alo luh ve loh nan AH & Veterinary department mai ni lovin, Sawrkar department hrang hrang, NGO te leh mipui kan thawh ho that hle angai a ni,’ a ti bawk. Dr K Beichhua chuan African Swine Fever chu Mizoram chauh ni lovin India ram puma vawk vulhtute tan pawh harsatna a thlen theih dawn avangin Union Minister of Animal Husbandry, Dairying and Fisheries Pu Giriraj Singh pawh he harsatna chungchang hi lo sawipui tawh thu leh mithiam ten Mizorama ASF zirchiang tur a anlo kal thu te a tar langa,” Ram pawn atanga vawk talh tur leh a note lakluh kan khap bur loh chuan he natna laka lo inven hi a sawt mawh hle dawn a ni,” a ti. Minister chuan Vawk lakluh khapna kalpui chu a hlawhtling anih chuan vawksa leh vawk note ah kan intodelh a tul hle dawn thu sawiin,’ Piglet multiplication centre hmun engemaw zat ah siam a ni a, hetiang lama tui kan thalaite leh entrepreneur te pawh pen chhuak turin ka sawm nghal a ni,’ a ti bawk. Dr K Beichhua chuan AH & Veterinary department hmalaknate tar langin bawng insurance kalpui mek anih thu leh vawk insurance titu tur erawh company tiduh anla hmuh mai loh thu a sawi bawk. Vawiin workshop a sawrkar department aiawha tel zawng zawngte chu Minister chuan an theihna zawn theuhah he natna laka kan ram a him theih nan hmalakpuiah a sawm nghal bawk a ni.

Dr Hmarkunga, Director, AH & Veternary department chuan thuhma sawina hun neiin African Swine Fever natna kai vawkte chu zaa za (100% mortality) in an thihpui theih thu te, Mongolia, China, Vietnam, Lao PDR, DPR Korea, Cambodia leh Myanmar ah te a darh mek thu te leh Mizoram alo luh ve loh nana AH & Vety department leh College of Veterinary Sciences & Animal Husbandry, Selesih te nena hma lakna an kalpui dan te a tar lang a ni.

Vawiin Sensitization workshop ah hian LAD, Commerce & Industries, Assam Rifles, BSF, DC Office Aizawl, GAD, AMC, I&PR, Police, Pigfed leh Custom aiawh atang te in an rawn tel a, African Swine Fever ram chhung a lut tur ven nana hmalak dan tur leh ruahmannate sawi ho a ni.   Pu Lalthangpuia Sailo, IAS, Commissioner/Secretary, A.H. & Veterinary Department in kalkhawmte lawmthu hrilhin he workshop hi khar a ni.

Vawiin worshop ah AH & Veterinary department in an tar lan danin Kum 2013, 2016 leh 2018-ah PRRS (Porcine Reproductive Respiratory Syndrome) hri nasa taka Mizoramah a len avangin vawk tam tak an thih phah a. Kum 2013-ah vawk 3806 thi report niin, cheng nuai 317.09 lai hloh a ni a, 2016-ah vawk 4699 thi report awmin, cheng nuai 436.896 hloh anga chhut a ni bawk . Kum 2018-ah chuan vawk 2574 thi report niin, cheng nuai 308.88 vel hloh anga chhut a ni a. Heng bakah hian report loh engemaw zat a awma rin a ni. Kumin 2019-ah erawh chuan PRRS hri a len loh nan A.H. & Veterinary Department in theihtawp a chhuah bakah, ramdang atanga vawk lakluh te District Administrator te nena tangrualin khap a nih bawk avangin PRRS report hi a la awm lo a ni. PRRS aia enkawl hautak zawk vawk natna ASF chu 1st August, 2019 khan Myanmar-ah a leng tih hmuhchhuah a ni a. Hetiang a nih avang hian Myanmar nen ramri thui tak kan intawm bawk si a, India ram State zawng zawngah hian dinhmun hlauhawm berah kan ding mek a ni. Nitin sumdawng an lutin an chhuak renga, vawk pawh khap a ni chungin tawlh luh ruk a ni reng bawk a, heng bakah hian vawksa atanga siam, i.e. sausage, meatball, etc. lakluh reng a ni a, he natna bikah chuan hengte pawh hi a hlauhawm vek thei nia tar lan a ni bawk.