Sports & Youth Services Department chuan an Minister Pu Robert Romawia Royte hovin vawiin khan MJA Conference Hall, Treasury Square, Aizawl-ah Asia khawmualpuia Youth Football Tournament lian ber Subroto Cup International Football Tournament, 2019-a Under-14 boys category champion Mizoram team chawimawina hun an hmang.

Sports Minister Pu Rober Romawia Royte chuan he hunah hian Mizoram tihmingthatu inkhel thiam te a lawmpui thu sawiin Sports & Youth Services Department enkawl Regional Sports Training Centre Football Academy, Saidan Kolasib-a training an nih avangin sawrkar hmalakna tihlawhtlingtu chhuanawm tak an ni a ti a. Regional Sports Training Centre, Saidan Kolasib chu tihchangtlun tum niin Sports Authority of India (SAI) Centre ah puan a ni tawh a, reilote ah Centre sakna tur lungphum pawh phum tum niin New Delhi a SAI Director-General pawhin he hun rawn hman hi a tum a ni a ti. Minister chuan SAI hotute pawh an phur hle a, Saidan Cebtre a football ground pawh phullem (Artificial Turf) phah turin tunah hian hma an rawn la tan nghal der tawh a ni a ti. Football hming chawi SAI Centre kan neih hmasak ber tur a ni a, Football bakah sports discipline dang pawh huam tel a a tlem berah zirlai 100 tal enkawl theihna tura siam tum a ni a ti.

Sports Minister chuan Sports hi Industry anga kalpui turin hma lak mek a ni a ti a, hei hi a hlawhtlin hunah chuan infiammite bakah a enkawltute tan pawh hlawkna a awm thei dawn a, eizawnna thar tha tak tak a inhawng dawn a ni a ti a, Industry hrang hrangte tana hlawkna awm ang te pawh a hmuh theih tawh dawn a ni a ti. Aizawlah under-13 Football Academy sawrkar hmalakna a buatsaih a duh thu sawiin kawng dap a nih tur thu a sawi a, Infiammi Mizoram tihmingthatute lawmman Incentive Scheme Rules pawh enthat mek a nih thu leh infiammi te tan sawrkar hna a luh theihna dan pawh ruahman mek a ni a ti bawk.

Subroto Cup Football Tournament, 2019 hi August ni 21 atanga August ni 29, 2019 inkar khan New Delhi ah khelh a ni a, Mizoram aiawhtu Saidan Secondary School, Kolasib hian an khingpui te hneh vekin Final-ah nikum Subroto Cup Football Tournament semi final a an hnehloh, champion nilai Unique Model Academy of Manipur chu sihnih faia hnehin an champion a ni. Tournament chhung hian Mizoram Team hian goal 44 an thun a, goal thum an chhuah a, Champion lawmman Rs. 3,00,000/- an dawn bakah Mizoram player Romalsawma chu Best Player ah thlan niin Rs. 50,000/- a dawng a, Mizoram Team Coach Lalbulliana chu Best Coach ah thlan niin Rs. 15,000/- a dawng. Mizoram Team hian Best School lawmman pawh dawngin Rs. 25,000/- hlan an ni bawk.

Semi Final atangin All India Football Federation hotuten inkhel hi a hmunah an en a, Mizoram Team player pasarih an chhinchhiah a, an ni hi reilote ah AIFF hnuaiah trial nei turin an kal ang.

Subroto Cup Football Tournament, 2019 hi a vawi 60-na, Diamond Jubilee Edition anih avangin kum dang aiin team tel an tam a, category hrang hrang pathum under-14 boys, under-17 boys leh under 17-girls ah then niin Team 112 an tel a, under-14 (boys) category bikah hian Team 36 telin India ram pawn atang Team  - Uzbekistan, Sri Lanka, Nigeria, Bangladesh leh Afghanistan te an tel a ni.

Subroto Cup Football Tournament, 2019 hi Subroto Mukerjee Sports Education Society Ministry of Youth Affairs and Sports, Ministry of Human Resource Development leh Sports Authority of India hriatpuina leh tanpuina a Subroto Mukerjee Sports Education Society leh Air Force Sports Control Board te buatsaih a ni.

Subroto Cup International Football Tournament, 2019-a Under-14 boys category champion chawimawina hun hi Sports & Youth Services Director Pu Zothanmawia’n a kaihruai a, Mizoram Team manager Pu Lalthawmmawia’n report pe in Mizoram Team leh an mahni enkawltu coach te hi lawmpuina diar leh tangkafai Rs. 15,000/- theuh hlan an ni. He hun hi Pu C.Lalmuanpuia, MLA leh Pu H.Biakzauva, MLA ten an hmanpui a ni.