Vawiin khan Health & Family Welfare Minister Dr.R.Lalthangliana hovin a pisaah Mizoram Synod Kohhran hruaitute leh Health Department hotuten HIV lama Mizoram dinhmun leh he natna darh chak avanga harsatna thleng thei hmachhawn dan turte sawihona hun an hmang.

Health Minister Dr. R. Lalthangliana chuan Mizote khawtlang, chhungkua leh mimal nuna kohhran pawimawh zia hriain kan rama HIV darh mek venna hnathawh pawh kohhran thawhpuina tel lo chuan MSACS tan thawh sen a ni lo tih sawiin, he natna pung zel hian kan ram leh hnam a nghawng dan turte thlir hova hmalak dan sawipui turin Synod hruaitute a sawm a ni tih a sawi.

MSACS chhinchhiah danin Mizoram HIV hrik pai 19631 hmuhchhuah an ni tawh a, kum 2018-19 chhung khan nitin mi 9 aia tam kaithar hmuhchhuah ang an ni a, heng zingah hian ruihhlo ngai leh hmeichhe inzuar thinte aiin mipui mimir pangngai an tam berin, mipat hmeichhiatna atanga kai mi 11827 (66.08%) an awm a, inchiuna inhmantawm atanga kai mi 5040 (28.16%) an awm.

Tun dinhmunah Mizoram hi India ram state hrang hrang zingah mipui cheng zat a tehin HIV kai tamna ber kan ni a, kum 15-49 inkarah mi 100 zelah mi 2 aia tam HIV hrik pai awm anga chhut a ni.

Dr.Thiamsanga, MLA pawhin he hun hi a hmanpui a, Health & Family Welfare Secretary Pu H.Lalengmawia, Principal Director Dr. F.Lallianhlira, Synod OM pariat leh midangte an tel a ni.