Mizoram cleanliness competition neih tur hmachhawn dan tur ngaituahin vawiin khan kolasib DC Conference Hall ah Bawrhsap kaihhruaina hnuaiah member te an thukhawm a, Bawrhsap hian intihsiakna a hawng nghal a ni.

Kolasib District urban Development Officer Pi PC Zonuntluangi kaihhruai ah hian hmalak dan tur hrang hrang sawiho ani a, kawr/luikawr, lui leh vantlang hmun thenfai, inthiarna vawn fai, bawlhhlawh paih dan bakah mipuite hnena zau zawka inzirtir dan tur te sawiho ani a, inelna/faina kawnga intihsiakna ah hian ODF leh bawlhhlawh sawngbawl that in mark 20 ve ve an pu a, awareness, mipui feedback leh kawr, lui faiin mark 10 theuh, community participation leh faina chungchanga kalphung thabika thawhhlawk (innovation and best practices) in mark 15 ve ve te an pu ang. Kolasib leh Biate khua chu garbage free city/town a puan a nih thu tarlan bawk a ni.

Tualchhung bawlhhlawh khawn leh paih chungchang ah village level sanitation committee ten mahni veng a remchan dan lo zirchiangin hei hi UD&PA hotute nen September ni 11 a sawiho leh tura rel a ni.

He faina kawnga inelna ah hian khawpui lian leh khaw te deuh chu category 1 leh category 2 a then an ni a, kolasib District ah hian Kolasib chu category 1 a dah niin, vairengte, Bilkhawthlir leh kawnpui chu category 2 a dah an ni, inelna/infaisiakna hnuaiah hian khaw fai berin lawmman pawisa fai cheng nuai 1 leh thuziak, pahnihna in cheng 80,000 leh thuziak, pathumna in cheng 40,000 leh thuziak an dawng dawn a ni.

Cleanliness competition hi faina kawnga Mizoramin hma alo sawn zel theihnan UD&PA Department hnuaia Mizoram Sanitation task Force chuan khawpui te tan huaihawt in kum 2017 khan bul tan a ni.