Vawiin khan Pu  Rameswar Teli, Sawrkar Laipui a Minister of State for Food Processing Industries chuan Aijal Club ah North East Scheduled Castes – Scheduled Tribes Entrepreneurs Conclave 2019 a hmanpui a, he Conclave hi Ministry of Micro, Small and Medium Entreprises hnuaia awm MSME Export Promotion Council buatsaih a ni a. Conclave ah hian Lok Sabha MP Pu C. Lalrosanga, Aizawl North II MLA Pu Vanlalthlana, Industrial Development Board Vice Chairman Pu C. Ramhluna leh Commerce & Industries Department Special Secretary Pu R Lalramnghaka te pawh he Conclave ah hian an tel a ni.

Minister of State for Food Processing Industries Pu Rameswar Teli chuan Prime Minister Pu Narendra Modi’ an Hmarchhak state hrang hrangah, ram chhung state dangte  angin hmasawnna thleng sela, eizawnna kawng hrang hrang pung sela, inkalpawhna tha sela tiin hmathlir a neih chu a taka  a thlen ngei theih nan  Minister te hi Hmarchhakah a zin fo a, mipui leh state te mamawh hre turin  thu rawn a pe  thin a, ama puala Radio Talk Show Maan Ki Baat ah te pawh Hmarchhak chanchin a sawilang fo thin a ni, a ti.

Pu Rameswar Teli chuan Conclave chu Ministry of MSME buaipui niin a lo tel ve mai a, a Ministry chan, Ministry of Food Proecessing Industries in thla hnih khat chhungin Mizoram-ah Workshop emaw, Road Show emaw Mizoram thalaite, food processing lamah bul tan duh mahse kawng hre lo te tan, a Ministry scheme leh hamthatna dawn theih hrilhhriatna tur programme ngei neih a nih tur thu a puang a. Mizoram-ah a Ministry in scheme pali an fund tih sawiin chung zinga lian ber ZORAM Mega Food Park cheng vaibelchhe 50 man chu naktukah a tlawh dawn tih a sawi a. A Ministry Budget chu vaibelchhe 1400 lai a ni a, Hmarchhak ah 10 percent cheng vaibelchhe 140 lai luang lut tur anih laiin heti zat hi a lut ngai lova, a luan luh lohna chhan nia a rin chu awareness a awm that loh vangin leh industry din duh te tan bank lam ten loan an pek that duh loh vangte nia a hriat thu a sawi. Mizoram thalai food processing lamah bultan duh tan a theih ang anga puih a inhuam thu a sawi tel bawk a ni.

Thusawitu dang Lok Sabha MP Pu C Lalrosanga chuan Hmarchhak leh Mizoram-ah ngei pawh ram chhung hmun dang ngaituahin thalaiten an themthiam leh an tuina lam eizawn nana hman, tunlai thil thar ‘Start-Up Revolution’ lamah an hnufum a, vawiina Conclave hian hemi kawngah hian thalai te a zirtirin, kawng a dap pui ngei a rin thu a sawi a. SC leh ST te  entrepreneurship lamah an kal fuha, an hlawhtlin theih nan kaihruaitu leh kawng kawhhmuhtu ‘mentors’ an mamawh tih a sawi bawk.

Vawiina Conclave ah hian zing lamah Entrepreneurs te tan Business Session neih niin MSME Export Promotion Council, NEDFi, APEDA, SIDBI leh NSIC atang tein inzirtirna leh inhrilhriatna hun neih niin zawhna leh chhana hun te hman a ni bawk.