Vawiin chawhnu khan Food Civil Supplies & Consumer Affairs Minister Pu K. Lalrinliana chuan Aizawl Zonuam Veng Retailer-I  Fair Price Shop(FPS)/dawrah Mizoram chhunga a hmasa ber ni tur leh tangkai taka hman turin Electronic Point Of Sale (ePoS) khawl hmanga ration lak theihna a hawng a.   

Retailer te dawra ePoS khawl bunin a   tum ber chu a dawng tur diktakin a chanpual (quota) dik tak, a hun taka, kim taka a dawn theihna a ni a. Mipui chanpual ration buhfai (leh state dangah chuan wheat, dal etc.) te a nihna tur niloa bothlau tur venna a ni pah bawk a ni.

Retailer te dawra ration khulhna tura khawl bun(FPS Automation) chu Ministry of Consumer Affairs, Food & Public Distribution leh National Informatics Centre (NIC) hmalakna leh India ram pumpuia kalpui mek a ni tih Supply Minister Pu K. Lalrinliana chuan a sawi a. Retailer zawng zawng ten  ePoS khawl an hman chhoh vek tur thu sawiin mipui ten quota khulh nan an kutzungthla(finger print) chuanna an Aadhaar Card leh an ration card te an thlun zawm vek a ngai tawh dawn a ni a ti a. Dik taka an chanpual theuh an  khulh  theih na turin  beneficiary te chu aadhaar card leh ration card thlun zawm tir ngei ngei turin a chah a ni. Minister chuan tun atangin  ePOS Machine te chu  Retailer dawrah install zel tum a ni a ti a. September thla chhung hian Aizawl khawpui chhunga Ration dawr 149 ah install zawh hman tum a ni. Tun dinhmunah Mizoram pumah Ration dawr 1270 a awm mek a. Heng dawr zawng zawngah te pawh  hian FPS Automation hi kalpui vek tum a ni a ti. He FPS Automation ah hian Digital Weighing Machine hman tel anih bawk dawn avangin mipuite hnenah an quota dik tak, a buk dik takin a thleng thei tawh anga. Retailer te chuan buhfai an  hralhna atang chauhvin hlawh (commission) a nei thei dawna. Chuvangin mipui ten buhfai an lak that zawk nan an taimak pawh a ngai hle dawn tih a sawi a. Buhfai bothlau a tlem telh telh tawh bawk dawn avangin sawrkar tan pawh hlawkna liantham tak a thlen theih a beiseiawm bawk a ni a ti a. Buhfai sem chungchanga thildik lo awm thin leh sawrkarin harsatna a tawh te pawh nasa takin min chhawk a rinawm a ni a ti.

Launch/Roll Out of FPS Automation - Zonuam Veng Retailer-I a ePoS khawl hawnnaah hian Pu Zothantluanga,MLA,15-Aizawl West-I Constituency bialtu pawh a tel a. FCS&CA Directorate lama hotute leh District tina DCSO te pawhin Minister hi an tawiawm a ni. FC&CA Director Dr.Lalhriatzuali Ralte chuan programme hi a kaihruaia. Sawrkarin ePoS kalpui a tum dan leh hma a lo lak chhoh dan te Pu Robert C. Lalhmangaiha, Dy. Director, FCS&CA hnen atangin ngaihthlak a ni a. Technical Report, Pu Lallawmkima, Scientist - B, NIC- Mizoramin a pe bawk a. Thusawi, Pu HL Rochungnunga, Commissioner & Secretary, FCS&CA hnen atangin ngaihthlak a nih hnuah FPS Automation/ ePoS Machine hman dan entir a ni a. Pu Lalkunga sailo, DCSO, Aizawl West chuan lawmthu sawiin he hun hi a khar a ni a. ePoS hmang hian programme zawhah beneficiary thenkhatte chu ration  khulhtir nghal an ni.

FPS Automation-ah hian buhfai hralh nan ePOS machine hman ani dawn a, chu khawlah chuan beneficiary te kutzungthla (finger print) hmangin an quota tur pek an nih dawn avangin leh chu an fingerprint chu Aadhaar ami nen en mil (authenticate) vek anih dawn avangin, ration card neitu chhungkua ami aadhaar number thlunzawm lo chuan ration an la thei tawh dawnlo a, card in hawh sak mai mai pawh a theih dawn loh ani. Mipui ten an ration lak dan te zawng zawng pawh internet kaltlangin server-ah a in chhinchhiah  zel dawn avangin thla tawpah hralh bang a awm anih pawhin a hriat theih vek dawn a. Retailer tan a hralh bang chu a thla leh quota atan rin nghal zel tur ani dawn a ni.

FPS Automation atana khawl hman thin hi ePos (electronic Point of Sale) Machine an ti a, thil hralh nana hman chi electronic khawl chikhat ani ber mai. He PoS machine kan hman tur hi Visiontek siam niin a model hi GL-11 a ni. He khawl hian finger print scanner, touch screen, QWERTY keypad, thermal printer, SIM card slot 2, wifi adapter te nei nghal vekin a tul chuan iris scanner pawh vuah theih ani. Operating System ah hian Linux a hmang a, application kan hman tur hi AePDS Team, NIC Hyderabad te siam ani bawk. Heng a hardware leh software kan hman tur zawng zawng hian Ministry of Consumer Affairs, Food & Public Distribution leh NIC ten a guideline an duan te, UIDAI ho duh dan te a zawm vek ani.

Tunah hian kan FPs data te, Ration card data te, Allocation data te hi NDC Deini server-ah a awm vek a, kan ePOS server hi NDC Hyderabad ah a awmin, thla tinin ration lak nana dataa pawimawhte chu ePos server ah hian lakluh thin ani a, chumi hmang chuan ration kha sem tur ani ta a ni.

He ePOS machine hi hman tan anih hmain a awmna tur FPS number te, FPS dealer hming, mobile number leh Aadhaar number te bakah dawra hawn theihloh changa hawnsak tu tur nominee ni pahnih te hming len Aadhaar number te nen a configure vek ani a. Heng a dealer leh a nominee mi 2 te bak hian tumahin a khawl hi an hmansak thei dawnlo  a ni.

Ration la tur hian an ration card a Aadhaar number dah (link) tu emaw ber kha a lo kal anga,chutah a Ration Card Number emaw, a Aadhaar Number emaw Pos machine ah hian chhutluh ani anga, tichuan fingerprint scanner ah hian a kut zungtang a nem anga, chu chu UIDAI serverah a zuk in finfiah (authenticate) anga, a Aadhaar number leh a fingerprint a inmil chuan an chhungkaw ration lak theihzat (quota) a lo lang anga. Tichuan electronic weighing device POS machine nena in zawm (connect) ah chuan a ration lak tur chu buk ani anga, a lak zat diktak an chhinchhiah zel dawn ani. Engemaw avanga fingerprint authentication hi a dik theih loh tlat palh pawhin SMS hmangin authentication hi a tih theih bawk a, Card holder mobile numbera-h OTP (One Time Password) a lo thleng anga, chumi hmang chuan ration chu a lak theih dawn bawk a ni.