No.3043/2021-2022
Aizawl Sahmulphah thla ni 18, 2021: Animal Husbandry & Veterinary Minister Dr K. Beichhua chuan cheng nuai 90 senga sak, Lawngtlaia District Veterinary Hospital building thar chu vawiin khan a hawng.

AH & Vety Farmer Training Hall, Lawngtlaia District Veterinary Hospital building hawnna puala inkhawm buatsaihah Minister Dr K. Beichhua chuan COVID-19 hri leng karah sawrkarin ram hmasawnna hna thawh thulh lovin, a theih ang angin hma a la reng tih sawiin, AH & Vety Department hnuaiah district 7-ah Veterinary Hospital sak niin, tuna mi nen pali (4) chu hawn a nih tawh thu leh district thar 3-ah pawh Veterinary Hospital sakna tur sum dah fel leh vek a nih tawh thu te a sawi a. Artui thar chhuah lama Mizoram a intodelh theih nan sawrkarin Tanhrila Vety Farm-ah tum khata artui sing ruk awp keu theihna (hatchery) a ruahman mek thu leh Lawngtlai District-a Mampui AH & Vety Farm-a tum khata artui sang hnih awp keu theihna dah tawh pawh tihchangtlun tum mek a nih thu a sawi.

Dr K. Beichhua chuan Mizorama ran talh za zela 70 chu ram dang atanga lak luh a nih avangin, AH & Vety Department chuan saa Mizoram a intodelh theih nan hma a la chho zel dawn tih sawiin, District Council te nen pawh thawh hona tha tak a awm zel a duh thu a sawi bawk.

Lawngtlai East Bialtu MLA, Agriculture Development Board Vice Chairman Pu H. Biakzaua chuan Mizoram sawrkar atanga Lawngtlai District-in hmasawnna a hmu chho zel chu lawmawm a tih thu sawiin, Lawngtlai District chu India leh Myanmar insumdawn tawnna tur Kaladan Multi Modal Transit Transport Project kawngpui sial mek intanna a nih avangin Mizoram sawrkar pawhin a thlahthlam a rem lo a, chu vangin hmasawnna hna thawh hmuh tur a awm reng a ni, a ti a. Tuna Lawngtlai District-in ran vulhte enkawl damna tur hospital a nei thei ta chu lawmawm a tih thu te, sawrkar flagship programme SEDP pawh kum thar 2022 atanga sem chhuah tan tum a nih thu te a sawi bawk.

District Veterinary Hospital building thar hawnna inkhawm hi AH & Vety Department Secretary Pi Lalzarmawii'n a kaihruai a. Pastor R. Lalfakawma, Presbyterian Kohhran Lawngtlai Bialtu chuan hunserh hmangin, AH & Vety Department Director Dr H. Laltlanmawia chuan technical report a pe a. Lawngtlai District AH & Vety Officer Dr Thanseia Chhangte chuan lawm thu sawiin hun a khar a ni.

District Veterinary Hospital building hawn tak hi Rs 90,00,000/- (cheng nuai sawm kua) senga sak niin, a sakna sum hi RIDF loan Rs nuai 85.05 leh Mizoramin a tum ve tur Rs nuai 4.95 a ni a. Building hi A.I.E. Construction, Tuikhuahtlang, Aizawla mite sak niin, kum 2019 March ni 31-ah sak tan a ni a. Zawh hun tura ruahmanah hri leng avang leh harsatna dang avangin sak zawh hman a ni lo va. Kumin October thla khan hawn theih tura peih fel a ni.

Building Ground Floor-ah hian room 6 awmin, a chhawngah room 6 bawk a awm a. Ran vulh lian chi leh a te chi zaina pindan (operation room) pawh a hran ve vea ruahman niin, staff room leh vaccine pekna tur room te, ran damlo enkawlna tur room bakah, ran enkawl dam tawhte chawlh hahdamna tur recovery room te pawh ruahman a ni.

Minister Dr K. Beichhua hi AH & Vety Department official-te, Lawngtlai Bawrhsap Dr Andrew H. Vanlaldika, LADC CEM Pu V. Zirsanga leh Executive Member thenkhat bakah, Lawngtlaia sawrkar department official leh party hruaitu te'n an tawiawm a ni.