861/2023-2024

Aizawl 20th June 2023: Vawiin khan Mizoram State Animal Welfare Board (MSAWB) chuan an Chairman Er. Lalrinawma, AH & Vety Minister hovin S.A.D Conference Hall, MINECO-ah thutkhawmna an nei.

Chairman Er. Lalrinawma chuan thutkhawmna hun tha tak an nei thei chu lawmawm a tih thu sawiin thilsiam dangte a bik takin ran chunga ngilnei leh zawldawh taka awm chu mitin mawh phurna a ni, a ti. Mizorama ran vulhte bakah state pawn atang ran lakluh te pawh duat taka enkawl an nih na tur atan Mizoram State Animal Welfare Board chuan nasa takin hma a lak thin thu tarlangin uar zawka hmalak zel anih tur thu a sawi bawk.

Thutkhawm ah hian thu pawimawh tak tak ngaihtuah niin J.B. Foundation-a ran chhanchhuahte enkawl emaw lachhawng (adoption) duh an awmin inkaihruaina felfai tak a awm theih na turin AH & Vety Department chuan 'Prevention of Cruelty to Animal Act 1960' hnuiah inkaihhruaina (guidelines) felfai tak lo siam se tih a ni. Ran phurh chungchangah 'The Transport of Animal Rules 1978' chu khauh zawka kalpui ni se, dan bawhchhelo tura inzirtirna uar zawk a kalpuiin Mizorama kohhran leh pawl hrang hrangte hnenah lehkha sem nise tih niin dan bawhchhiate hrem an nih ngei theihna tura hmala turin J.B.Foundation- te chu ruat an ni. Ui inthlahpuntir leh zawrh chungchangah 'The Prevention of Cruelty to Animals (Dog Breeding and Marketing) Rule 2017" chu khauhzawk a kalpui a, ui inthlahpuntir duh bik te tan State Animal Welfare Board-ah registration- ti ngei turin hmalak nise an ti a. Ran leh ran, ran leh mihring in kara buaina lo thleng thin ah a tul ang a hmalak a nih theih nan AH&Vety Department chu inkaihruana lo siam tur a tih an ni.

AH&Vety Call Center Helpline No 1962-chu ran leh ramsa tihduhdah tuar an awm a, mipuiten thuneitute hnena an report zung zung theih nan zawm ve nise an ti a. Cruelty to Animals Act-hnuaiah Police leh Transport Department-te chu zirchianna neihpui tha tiin zirlai naupangte hnenah pawh inzirtina kalpui nise an ti bawk. Mizoram puma Local Council leh Village Council-te hmantlan theih tur ran khuahkhirna dan tha zawk siam turin 'The Mizoram Animal (Control & Taxation) Act 2014' chu ngun leh zuala zirchian nise, ran thi te phumna tur (common cementry) siam nise, LC leh VC hnenah a tul ang a ram dil nise tih a ni. Ui talh leh a sa zawrhna te a lo tlem zawk theih nan 'The Mizoram Animal Slaughter (Amendment Act 2020' chu khauh taka kalpui nise, ui sa zuar tihrem nan ui talh leh a sa zuar thinte lakah a tul ang a complaint thehlut turin MSAWB chuan hma la se tih an rel bawk.

Vawiin thutkhawm hi Pi Lalzarmawi, IAS, Secretary, AH & Vety Department chuan kaihruaiin Animal Welfare Board Committee hmalakna leh hmachhawp hrang hrang tarlanna a nei nghal a, hun remchang hmasa berah thutkhawm hi neih leh tura ruahman a ni.

Mizoram State Animal Welfare Board hi 'Prevention of Cruelty to Animal Act 1960' hnuaiah din niin theih ang ang a hmalak zel a nih theih nan Animal Welfare Board chuan Animal Welfare Wing chu Directorate, AH&Vety Department- ah din in, AH& Vety Department hian a theih ang angin hma a la chho mek zel a ni.