Animal Husbandry and Veterinary Minister Pu Nihar Kanti Chakma chuan vawiin khan ar tui tam chi (Layer ar) vulhna hmunpui, cheng nuai 464.50 senna tur, Tanhrila Layer Hatchery Farm sak mek a tlawh a. AH&Vety Secretary Pu T Sangkunga, Jt.Secretary Pu B Lalthanliana, Director Dr LB Sailo leh officer dang ten an tawiawm a ni.

AH&Vety chuan Layer note man man zawk leh ar vulhtu ten hniang hnar zawk leh awlsam zawka Layer note an hmuh theihna turin Layer Hatchery Farm a siam a. Hyderabad-a INBRO Research & Breeding Farm Pvt Ltd te nen thawk hovin tunah hian a in sak leh a hmun hma ruahmanna a kalpui tan mek a ni. He hmunah hian Layer chi tha, a thlah tu tur (parent stock) vulh a ni ang a. Thla tin Layer note 41,000 thar chhuah tum a ni. He hmalakna hian artui-ah intodelhna a thlen beisei a nih piahlamah ar vulh leh a kaihhnawih a eizawng te an lo pun phah beisei a ni bawk.

Tunlai thiamna hmang tangkaia ar vulh dan pawh tihdanglam tum a nih avangin AH&Vety Department in ar vulhna In hlui a neih tam zawk chu thiah a ni a. A vulh dan thar mil turin building sak thar bakah a awmsa thenkhat te chei that hna thawh tan mek a ni.

Pu Nihar Kanti Chakma hian ranchaw siamna hmunpui Tanhril-a Animal Feed Plant a tlawh bawk a. He Animal Feed Plant-ah hian vawk, bawng leh ar chaw siam thin niin ni khatah ran chaw Ton 50 zet a siam chhuak thei a ni.