Mizo zinga Mt. Everest lawn chhuak hmasa ber David Zohmangaiha leh base camp-a an puipa ber Pu Vanlalliana te pualin zanin khan Sports Minister Pu Zodintluanga chuan Aijal Club-ah zanriah a buatsaih sak; zanriah hi Sports Department-a thawkte leh mi sawmbikten an kilpui a ni.

Pu Zodintluanga chuan, “Adventure sports hi a tuimite chuan an buaipuina a rei ve tawh hle a, vawiina Mizo tlangval ngeiin Mt. Everest a lawn chhuak ta hian hlawhtlinna vawrtawp min thlenpui a, Mizo hnam ang leh sawrkar ang pawhin David Zohmangaiha hlawhtlinna hi a chhuanawm tak meuh a ni”, a ti. Sports Minister chuan Mizo zinga lawmpuitlak hlawhtlinna nei te fk leh chawimawi kawngah tawngkamtha kan ren lutuk chu inenfiah tul a tih thu sawiin, “Tun tuma David Zohmangaiha'n Mt. Everest tlangchhip a thleng thei pawh lawmpui a, chhuan em em mai tur a nih laia ringhlel ang ziazanga thu vawrh darh duh tawk kan awmte hi a vanduaithlak a ni”, a ti.

Sports Minister chuan adventure sports bikah Mizo thalaiten hmasawnna tur leh dai zau tur kan la ngah thu sawiin, “Vawiina hlawhtlinna ropui tak kan hmuh hian thalaite leh sawrkar rilru pawh min chhem alh thar se ka duh a, sawrkar ang pawhin kan tih theih tawk hi a la beitham hle tih kan hri a. Adventure sports tih hmasawnna tur hian theih tawp chhuah turin a tuimite leh sawrkara mawhphurtuten rilru kan sen a pawimawh hle dawn a ni”, a ti.

Mizo zinga Mt. Everest lawnchhuak hmasa ber David Zohmangaiha pawhin lawmthu sawiin, “Hetiang dinhmuna kan din theihna tur hian sum tam tak senga training hautak tak tak paltlang a ngei a; chutianga kan senso tur min tumsak thintu Mizoram sawrkar chungah lawmthu ka sawi a. Mt. Everest lawn tura mimalin kan thawh ve tur cheng nuai 2 min tumsak bakah, senso tul dangte min ngaihtuahsak vek a; kan hlawhtlinna min lawmpuina atana cheng nuai 5 zet mai min la pe lehzel phei hi chu phu lo ka inti em em a ni”, a ti. Sawrkar leh NGO hrang hrangten anmahni chawimawina an buatsaihsak avangin base camp Manager Pu Vanlalliana pawhin lawmthu a sawi bawk a ni.

Zanriah kil hmaa inkhawm hi Pu R. Lalvena, IAS, Sports Secretary chuan a kaihruai a. Sports department-a mawhphurhna an chelh laia Mizo zinga Mt. Everest lawn chhuak hmasa ber an awm chu Sports Minister leh ama tan pawha thil chhinchhiahtlak a nih thu sawiin, “A hmasa ber nih hi a har em em a; thangthar tam zawkin David Zohmangaiha hnung hi an rawn zui ka beisei a, amah ang thalai tam tak kan neih ngei theihna turin he hlawhtlinna hian min cho chhuah ngei ka ring a ni”, a ti.

India hmar-chhak state 8 zinga state 6 aiawh telna Ist North East India Top of The World Expedition 2013 team hian ni 75 zet Mt. Everest lawn leh chhuk nan an hmang a; team meber 16 zinga 14-te chu tlanglawn chhuak tur bik an ni a; mi dang 2 chu an innghahna hmun nghak an ni a, hmun nghaktu zingah hian Pu Vanlalliana a tang a, David Zohmangaiha chu Mt. Everest lawn chhuak zingah hian a tel ve thung a. Tlangchhip thleng hian mi 11 an lawn a, an zinga 3-te erawh chu an hriselnain a tlin loh avangin an lawn chhuak ve thei ta lo a ni.