Thei hrisel, tangkai leh man man tak hatkora chin, enkawl leh hralhchhuah bakah a kaihhnawih thil chi hrang hrang awm thei, uluk lehzuala zirchianna hun chu nimin khan I&PR Conference Hall-ah buatsaih a ni a. Seminar khuallian, Trade &Commerce Minister Pu Lalrinliana Sailo chuan hatkora hian Mizoram sumpai nasa taka a chawikan theih a beisei thu a sawi a ni.

Saptawng nitin chhuak chanchinbu ‘Mizoram Post’ bultuma Zo-Sports Aizawl ten an buatsaih he seminar hi Zo-Sports Managing Director B.Vanlalhruaia’n a kaihhruai a. Trade &Commerce Minister Pu Lalrinliana Sailo chuan Mizoram leh ramri dep ramdang te nena insumdawntawnna tur border trade kalpui mek leh hmabak la awm te a tlangpuia sawiin a bikin Bangladesh leh Mizoram phei hi chuan hun engemaw atang tawh khan he insumdawntawnna hi an kalpui tawh a ni, a ti a. Mizoram tharchhuah sawhthing, hmarchha, hatkora leh thildang thahnem tak Bangladesh ramah hian thawn luh tawh niin 2010 July thla atang khan an company lian tak pakhat nen thuthlung pawh ziah fel tawh a ni, a ti a. Amaherawhchu, harsatna tawh thin langsar tak erawh chu Mizoram thlai leh thei tharchhuah reng reng tam tawka ngaih te hi company lian zual tan te erawh a tam tawklo fo thin hi a ni, a ti. Chief Minister phurpuinaa hatkora bik chungchanga hma an lo lak tawh dan tlangpuite sawiin theihtawp chhuah zel an tum dan hatkora chingtu kalkhawmte a hrilh a. Mizoram tharchhuah reng reng khuahkhirhna awm lova zalen taka a chingtu ten an thehthang a, man man zawk an tel theih chu Mizoram sorkar duhthusam a ni fo thin, a ti. Health Department leh AYUSH lam atang pawhin hatkora hi damdawi tangkai tak atana siamchhuah dan kawng a awm a rin thu pawh sawiin hatkora chingtute tawiawmna a dil zui nghal a ni.

Nimin seminar-ah hian Assam University atanga lokal Prof.Manabendra Dutta Choudhury te, sorkar laipuia Industrial Consultant Dipak Paul, Mizoram Post Editor Nilotpol Choudhury ten thil pawimawh chi hrang hrang an sawi a. Mizoram Enterpreneurship Network Chairman Pu Joseph L. Ralte pawhin kum kalta chhung khan Mizorama hatkora zirchianna survey an neih report chipchiar takin a tarlang a ni.

Seminar hi Zo-Sports lamin an kuang lo nawr ang thei hiala an buatsaih hlauh chhan leh vang chiang takin Managing Director chuan a sawi fiah a. Kuthnathawktu te hmakhua leh hmabak eng tak an neih sut tlangpui tura seminar hi buatsaih a ni.

Seminar hi Hatkora Growers Association leh AMFU hruaitute, hatkora chingtu leh tualchhung chanchinbumi ten an chhim a ni.