875/2023-2024

Hnahthial the 21st June, 2023 - AH & Vety Department changtu Minister Er. Lalrinawma chuan vawiin khan District AH&Vety Office, Hnahthial chu Vety Complex-ah a hawng a, office hawn lawmna inkhawm hi Horeb Conference Hall-ah neih chhunzawm a ni.

Hnahthial District AH&Vety Office hawn lawmna inkhawm Pi Lalzarmawii, Secretary, AH&Vety Department kaihhruaiah Minister Er. Lalrinawma chuan thu sawiin Hnahthial District-in hmasawnna thar duhawm tak a nei leh chu lawmawm tiin, District AH&Vety Office chu District hmasawn zelna tura hmanraw pawimawh tak ala nih chhoh zel a beisei thu a sawi a. AH & Vety Department a chan hnuin thawktute thawrimna leh inpekna nasa taka a hmuh thu sawiin theihtawp chhuaha hma an lakna zarah SEDP-ah pawh a ti tha pawl kan ni thei hi a lawmawm takzet a ni, a ti a. AH & Vety Department chu Mizoramin ei leh bara kan intodelna kawnga pawimawh tak anih thu sawiin, Department thawktute hmalakna avanga mihring hriselna atana pawimawh sa thianghlim chi hrang hrang eitur kan nei thei ta hi a hlu hle a ni a ti bawk.

Minister chuan mahni mihring puite ngaih pawimawh chu Pathian duhzawng a ni a, office-a hnathawk kan ni emaw hmun danga hna thawk pawh ni ila, keimahni mihring puite kan ngaihsak phawt chuan khawtlang nuam, ram nuam kan siam thei ngei ang tiin, ramngaw leh nungchate duat tak leh dimdawi taka enkawl thin turin kalkhawmte a chah bawk a ni.

Khualzahawm Pu C. Lalmuanpuia, MLA & Vice Chairman, SEDP Board AH&Vety etc. pawhin thu sawiin, kan sorkar chuan District thar pathum kan ti puitling ang kan tih angin Hnahthial pawh hetah hian a tel a, theih tawpa chakin hmalak nghal a ni a, kei phei chu ka lawm zuala, Assembly-ah pawh District thar chungchangah private member resolution siamtu kha ka ni a, vawiinah hmasawnna hmel thar kan hmu chhunzawm ta hi a lawmawm tak zet a ni a ti bawk.

Thusawitu dang Hnahthial District Bawrhsap Pu R. Lalremsanga pawhin Hnahthial-ah Agriculture department hnuaiah Agriculture thiam zirna, School of Agriculture Sciences (SAS) a awm a, hei hi tih chantlun chhoh zel niin hun reilote-ah hawn a ni dawn a, he institution-ah hian VFA te, Sericulture lam zirna te hi awmho thei se a duh thu leh DVO office hawn a ni thei chu lawmawm a tih thu a sawi a ni. Dr. Ngurzidingi Sailo, DVO Hnahthial chuan lawmthu sawiin hun a khar a ni.