874/2023-2024

Champhai, the 21th June, 2023: Ruihhlo leh a kaihhnawih hrang hrang laka India ram a fihlim theihna tura Sawrkar laipuia Ministry of Social Justice & Empowerment leh Mizoram State Social Defence & Rehabilitation Board-te tangkawp hnuaia National Action Plan for Drug Demand Reduction (NAPDDR) hmalakna, 'Nasha Mukh Bharat- Drug Free India Campaign' kalpuitu District Level Nasha Mukt Bharat Abhiyaan Committee, Champhai District chuan meeting thurel bawhzuiin Champhai khawpui chhunga Rehabilitation Centre hrang hrang 6 te tlawhchhuah program June thla chhungin neih ni se tih chu vawiin khan an zo fel.

He hunah hian remchan danin District Bawrhsap Pu James Lalrinchhana, Chairman, NMBA Champhai District, Member Secretary, NMBA Champhai District Pi P.B. Liansangpuii, Coordinator, Mizoram Social Defence & Rehabilitation Board (MSD&RB), Social Welfare & Tribal Affairs Department leh Member dangte an tel thin a. June ni 13, 2023 atang khan Rehabilitation Centre tlawh program hi tan niin, vawiin khan zawhfel a ni a. Mazuia Memorial Home (TNT), Synod Rescue Home, Reformation Centre, Emmanuel Rescue Home, Grace Receiver's Home leh Gosen Home-te tlawhin an enfiah a ni. Centre tlawh pah hian hmasawn zel nana tulte zirchianna an neih bakah thawktute kawmin hun an hmang thin a. Ruihhlo ngaite enkawlna hmun Rehabilitation Centre hrang hrangte kalphung leh inenkawla kawnga hmasawn ngaihna laite endika inhrilhhriatna neih a ni.

Nasha Mukh Bharat Abhiyaan- Drug Free India Campaign hnuaiah hian India rama District 272 ahte ruihhlo do hmalakna kalpui hmasak a ni a. Nikum August thla khan District 100 dang telh belh leh a ni a, tun dinhmunah District 372 ah kalpui mek a ni. Aizawl, Kolasib leh Champhai District-te chu Mizoram atanga he campaign kalpuinate an ni a; Narcotics Control Bureau (NCB) leh Ministry of Social Justice & Empowerment kaltlanga National Survey neihin drug hluarna District nia a tarlan zulzuia thlante an ni.