Sum cheng nuai 464.50 senga Zoram Poultry Development Society leh INDBRO, Hyderabad te tangkawpin artui awpkeuna leh ar vulhna an din thar INDBRO Poultry Hatchery Farm, Ramrikawn, Tanhril chu vawiin chawhnu dar 2:00 khan AH&Vety Minister Pu C.Ngunlianchunga’n a hawng.
Hawnna thu sawiin Minister chuan Mizo hnam nunphung leh ran vulh inzawm tlat thu te leh ran enkawltu AH&Vety Department chu mipui nena inthlunzawm tlat a nih dante a tarlang a, ran hriselna leh enkawlna tha zawk siam tura AH&Vety Department-in theihtawp chhuaha tan a lak mek dan te a sawi lang bawk. Scientist te thiamna hmanga ar vulh dan leh awpkeu dan tha zawk thawhna tur INDBRO Poultry Hatchery Farm hawn a ni ta chu lawmawm tiin Minister chuan mipui tan man man zawka artui leh ar no te lei tur a awm thei tawh dawn a ni, a ti. Mizoram mipuiin kum khatah artui nuai 371 chuang kan eiral zinga a tam zawk chu state pawn atanga lakluh a ni tiin Minister chuan kan intodelhna tura rahbi pawimawh tak a nih thu a tarlang bawk. Hatchery hawn tharah chuan chi thum, artui tam chi (layer) leh ar vulh awl chu low input bird (dual purpose) leh Broiler (a sa ei chi) thla tin ar no te 41,000 vel tharchhuah tum a nih thu te, chung ar no te chu market rate aia tlawm zawka ar vulh tu te hnenah hralh chhuah tum a nih thu te Minister chuan a sawifiah bawk. Ar vulh tur chu India rama breed tha INDBRO Broiler a nih thu sawiin ar vulh dan technology pawh India rama ar vulh lama hlawhtling bera ngaih Andhra Poultry Technology hman a nih tur thu te a tarlang a. Ar no te chu INDBRO Hatchery atanga hralh tan phawt tur niin a hnu zelah district tina ar farm atanga hralhchhuah tum a nih thu a sawi lang bawk. AH&Vety department-in vawk vulh lama hma a lak mek dan te tarlangin Minister chuan UK atanga vawk chitha lakluh a, Zoram vawk vulh te nen thlahpawlh vawk tha zawk siam an tum dan te a sawi lang a. State pawn atanga vawkpui 200 la luta Thingsulthliah vawk farm atangin vawk note kum tin 7000-8000 vel thar theih beisei a nih thu te a sawi bawk. NLUP hmalakna hnuaia bawng vulh tu te bawnghnute tharchhuah MULCO-in a lak sen tawh loh avanga beneficiary te harsatna sutkian nan bawnghnute atanga thil danga siamchhuahna khawl cheng nuai 350-in din mek a nih thu te a tarlang a. Bawng vulh tu ten a chaw lama harsatna an tawh phuhruk nan ram hectare 680 vela zau district 8 ah fodder chin mek a nih thu te a sawi lang bawk. DM&R Minister chuan tunhnaia Nepal rama lirnghing-in chhiatna nasa tak a thlen dan ngaihtuahin Mizoram pawh lirnghing thleng thei reng a nih hre renga, chhiatna lo thlen thulha chhawmdawlna tur insurance mipuiin kan ngaihven a pawimawh thu a sawi lang a. Hemi kawnga hmalak nan DM&R Department chuan Property & Life Insurance man tlawm a buaipui mek thu te a sawi lang bawk.
INDBRO Poultry Hatchery Farm hawnna inkhawm hi AH&Vety Commissioner Pu K.Lalnghinglova’n a kaihruai a, AH&Vety Director Dr L.B.Sailo leh Dr Kotaiah, Technical Adviser, Indbro Poultry Hatchery & Managing Director, Indbro Research & Breeding Farms Pvt. Ltd ten technical report an pe bawk. Minister hi Parliamentary Secretary pahnih Pu Lt.Col.Z.S.Zuala leh Pu H.Zothangliana te, Pu H.Chhuanawma, Executive Member, LADC leh Pu Lalthanliana, MLA ten an tawiawm a, NABARD hotu te leh khawtlang hruaitute an tel bawk a ni.
