Deputy Commissioner, Lunglei District chuan vawiin khan ama pisaah District officials te nen inhmuin Mizoram sorkar-in sikul kai hun a sawn hma duh loh avanga lungawi lohna entir nana thla khat leh chan ve chhung Lunglei-a bandh, hunger strike leh DEO Office kai tur dan te huaihawt a ni thin chu pawi a tih thu leh mipuite thlabar lova an awm theihna turin district administration chuan theihtawp a chhuah zel thu a sawi.
Lunglei Bawrhsap leh district hotu dangte chuan May ni 15, 2015 (Zirtawpni) khan Sikul Kai Hun Sawn Duh Lo Coordination Committee te nen thukhawmin lungawi lohna an entir mek chu ti tawp turin an ngen a. Naktuk ni 19.5.2015 (Thawhlehni)-a kawngpui dan (road block) an tum pawh thulh turin an ngen nawn leh thu a sawi bawk. Road block hian Lunglei khawpui leh district chauh ni lovin Lawngtlai leh Saiha district-a chengte zawng zawng pawh a nghawng dawn avangin hetianga mipuite tana harsatna siam lo turin DC chuan a ngen a ni.
Sikul tan hma duh loh avanga May ni 7 atanga chaw nghei engemaw zat an awm chu District hotute chuan nitin an tlawh a, DC Office, Magistrate, Police leh Medical lamin chaw nghei te chu an hriselnain a tuar lutuk dawn avangin hunger strike titawp turin an ngen thin a, an zinga chau deuhte chu a rang thei ang berin damdawi in panpui thin a ni. Medical team ten chaw nghei hote hi nitin an hriselna dinhmun an chek-up reng bawk a ni.
Vawiina DC leh district hotute thukhawm chuan sikul hun sawn duh lohna entirna kawng hrang hrang huaihawt thin chu mipui nitin khawsak leh zirlaite an zirna kawnga tibahlahtu a ni thei ang tih an hlauh thu an sawi a. Lunglei District huamchhungah boruak muanawm lo leh thil duhawm lo a thlen loh nan Sikul Kai Hun Sawn Duh Lo Coordination Committee te chu road block huaihawt lo turin an ngen nawn leh a ni.
