Aizawl District Fire Prevention Committee hmalakna kal zelah vawiin khan Aibawk Community Hall-ah kangmei laka invenna chungchang inzirtirna neih a ni a. Aibawk leh a chhehvel khua Sateek, Phulpui, Tachhip leh Maubuang atangin VC, tlawmngai pawl, sikul naupang leh sorkar hnathawk mi 300 chuang an kalkhawm a ni. He Campaign hi Pu Rosanglura, District Horticulture Officer-in a kaihruai a, Pu Lalthangliana Murray, IFS, Member-Secretary, ADFPC chuan zirtirna a pe a ni.

He huna Khuallian Parliamentary Secretary leh Bialtu MLA ni bawk Pu K.S.Thanga chuan ram kan suasam nasat lutuk chuan Pathian pawi khawih tluk kan nih thu sawiin ramngaw chereu lutuk tawh siamtha leh turin kalkhawmte a sawm. Fimkhur loh avanga ram tikang tute chuan hmasawnna an hrek tluk a ni a, chuvangin he bial chhunga VC leh khawtlang hruaitute pawhin uluk zawka kangmei chhuak thei tur laka inveng turin mipuite pawh hrilhhriat a tul thu a sawi a. Pu K.S.Thanga chuan hetiang hian tanpuina hrang hrang a pe bawk : MUP Run - Rs.1,00,000, MHIP Run - 70,000, YMA Library - 70,000, Maubuang Ruotmawi Prayer Home - Rs.40,000 leh Phulpui GSA hnenah TT Board.

Campaign zawhah hian Aibawk Community Hall vekah Khuallian Pu K.S.Thanga chuan Directorate of Agriculture (CH) Organic Cell buatsaih ‘Farmers’ Training on Nutrient Management in Organic Farming’ a hawng nghal a. Loneitu kalkhawmte chu zirtirna an dawn hmang tangkai tura chahin thiamna sang zawk nena hma an lak chuan an bial mai bakah Aizawla thlai zawrh tam tak an tum theih tur thu a sawi a ni.

He hun hi Pu Rohminthanga Colney, Dy. Director (Extn.), Directorate of Agriculture (CH) in a kaihruai a, Aibawk, Tachhip, Sateek leh Phulpui atangin kuthnathawktu mi 150 chuang he training-ah hian an tel a ni.