Vawiin khan Synod Conference Hall, Mission Veng-ah “...Arise and Eat” Lalte I na 19:7 thupuia hmangin People Living with HIV te leh Namkwang Church Korean Youth Team, South Korea atanga lokalte chuan Unity in Diversity-cum-Advocacy programme an hmang. Pu Lal Thanzara, Health Minister chuan he hun hi a hmanpui a ni.
Ram leh hnam tan te, kohhran leh khawtlanga chenho na atan te pawha pawimawh tak, ‘Unity in Diversity’ tih thupui hmanga inkhawm buatsaih a ni leh a bik takin HIV/AIDS veite leh he natna atanga Pathian zara la fihlimte inenhranna awm lova inpumkhata khawsa ho tur an ni tih vawiina zirho a ni chu lawmawm a tih thu sawiin Pu Lal Thanzara chuan hlawk taka hman a nih theih nan chhimtute duhsakna a hlan a. Agapia Social Centre leh People Living with HIV/AIDS pawl pahnihte hi tangkai leh pawimawh tak an niin biru taka mamawhtute tana hnathawk leh hmala thin an nihnaah chhuanawm a tih thu a sawi bawk.
Positive nih hi thihna “Death Sentence” ang tluk a ni tawhlo tih hriat a pawimawh in uluk taka an nun chuan damdawi leh inenkawlna tha hnuaiah Pathian zarah mipangngai ang takin an khawsa thei tawh a ni tiin Health Minister chuan HIV/AIDS veite nen hian thiantha leh chhungkua, unau, thenawm kan la ni reng a inenhran nachhan tur a awmlo. AIDS vei an nihna avang hian kan unaute an nihna a bo chuang lova, Natna dang veite ang bawkin kan ngaihvenin intanpui tawn tur kan ni tih hi hrechiang zel ila ramchangkang apiangah hetianga inenhranna hi a tlem a, keini Mizo, Kristian-te phei chu hetiang enhranna hi a ti lo tur ber kan ni tih hriat thar leh a ngai a, kan nitin nunah vawiina thupui hi ataka nun chhuahpuitu nih tum theuh a ngaih thu a sawi bawk.
AIDS natna do tur hian tih theih a inchen vek lova, a pawimawh ber chu INPEKNA a ni tiin khuallian chuan a hnena harsatna an thlen te chu a tih theih chin ah puih zel a in huam thu leh MLA ten cheng nuaih khat theuhva an thawh khawm tling khawm Cheng Nuai sawmli chu a tul leh ngaihpawimawha hman tur in MSACS office lamah chhun luh a nih tawh thu leh vawiin tlai lama hemi chungchang bawk Meeting on Legislative Forum on AIDS chungchang an neihah an la sawiho leh dawn thu a sawi bawk.
He programme hi Agapia Social Centre, The Light of Hope Ministry (LoH) leh Positive Women Network of Mizoram (PWNM) te huaihawta neih a ni. Agapia Social Centre Director Rev. Sang Soo Kim hi Korean Missionary, Mizorama hun rei tak rawngbawlna nei a lo awm tawh a niin a rawngbawlna pui tur in Namkwang Church atanga lokal S. Korean Youth Team te leh LoH, PWNM ten PLHIV te nena Support Group Meeting an neih thin chu Agapia Social Centre,Mizoram hian a lo thawhpui tawh thin a vangin, PLHIV te tana engemaw tal hamthatna siamsak in beiseiin he programme hi an rawn buatsaih a ni. Heng pawl bakah hian World Vision leh FXB ten technical leh Moral Support tha taka pe in an thawhhona a tha hle.
Vawiin programme hmang tura Korean Youth Team,South Korea atanga lo kal te hi an Senior Pastor Rev. Dae Bok Kim te nupa in rawn ho in mi 12 an lokal a, Rev Dae Bok Kim hi an speaker a ni.
Programme hi hun hniha then niin hun hmasa hi Pathian biak inkhawm pangngai (devotional) hun hnihna chu variety programme a hun hman a ni. Rev. Sang Soo Kim, Director, ASC hnen atangin “...Arise and eat” Lalte 1 19:7 thu hmangin thuchah ngaihthlak a ni bawk.
Korean Youth Team te hian ASC te nen an cham chhungin programme duansa angin hmun hrang hrangah hun an hmang anga, 1st February hian an ram lamah an haw leh dawn a ni.
