Land Revenue & Resettlement Department in chhiah an chhut leh lak dan chungchanga mipui lamin hriatthiam loh an neih te mipuite hnena hrilh chhawn leh puanzar anih theih nan vawiin khan Kolasib DC Pu H. Lalengmawia, IAS chuan khawtlang hruaitu, YMA Branch hrang hrang leh NGO dangte leh chanchinbu mite sawmin Kolasib DC Conference Hall ah hemi chungchangah hian meeting a neih pui a. DC hi SP Kolasib Pu C. Lalzahngoa, SIRD Director Pi Maria CT Zuali leh Asst. Settlement Officer, Kolasib District Pu H Lalramliana leh senior officer dangten an tawiawm a ni.

Pu H. Lalengmawia chuan chhiah reng rengin mipuiah nghawng a nei a, mahse chhiah pek hi mipuiin kan bat kan tih ngei ngei tur thil a ni a. Zoram chhiah te phei hi chu Mizo hnam kalphunga bet thil niin a lang a, chuvangin hei hi chu chhungkaw tin ten kan pe ngei tur a ni, a ti a. Ram leh building chhiah chhut leh lak dan chungchangah mipui lamin an hriatthiam lohte, an hriatfuh lohte leh hrilhfiah ngaite tih chian zawk anih theih nan meeting hi koh anih thu a sawi a. Vawiin meeting a chhiah chungchangah hrilhfiahna te chu mipui hnenah a zau thei ang bera hrilhchhawng turin DC chuan kalkhawmte hi a ngen a ni.

ASO Pu H. Lalramliana chuan Sawrkar dan neisa pangngai hnuaia chhiah chhut dan leh a lak dan kawnga ruahmanna an siam te zau leh chipchhiar takin a hrilhfiah a. Khawtlang hruaitute atanga hemi chungchanga zawhna awm te chhangin an hriatthiam loh te a hrilhfiah bawk a ni.

Chhiah lak dan chungchangah Kolasib mipui ten hriatthiam loh an neih thu a hriatin DC chuan chhiah khawn mek chu titawp lailawk turin thu a chhuah a. Mahse vawiin meeting ah hian heng thu leng hriatfuh loh te a tih chian leh a hrilhfiah takah chuan chhiah khawn hi tunkar tawp emaw kar leh ah emaw chhunzawm leh thei tura beisei a ni.