Vawiin khan Kolasib Venglai Field-a Stadium puitling sak mek chu Kolasib DC Pu H. Lalengmawia, IAS leh he hna vil tura din Monitoring Committee member leh he hna enkawltu UD & PA Department aiawhte chuan a hmuna kalin hnathawh dan te an en a. A hmuna an kal hma in DC leh Monitoring Committee memberte, NBCC aiawh leh he stadium satu Balaji Developers aiawhte chuan DC pisaah meeting an nei a ni.
Meeting ah hian sum an hmuh tawh zat te, hna an thawh tawh chin te leh an harsatna te chu DC hian contractor leh he hnaa agency NBCC aiawh te a zawt a. Monitoring Committee leh UD & PA Department aiawh te chuan VIP gallery sak mek chu a lai tawk lo nia an hmuh thu sawiin hei hi siamthat anih theih nan hma lak pui turin an ngen. Meeting zawh hian DC leh Monitoring Team chuan Stadium sak mek an tlawh a. A hmunah hian DC chuan Monitoring Committee ina thu an thlen leh an hmuh dante chu UD & PA Minister Pu Zodintluanga hnenah phone in a thlen nghal a. Minister chuan VIP Gallery lai lo chu a lai takah ngei dah anih theih nan a mawhphurtu agency chu a hriattir tur thu DC hi a hrilh a ni. Sports Stadium sakna tur lungphum hi Chief Minister Pu Lal Thanhawla chuan March ni 21, 2015 khan a phum a.
Sports Stadium sak tur hi Mizoram sawrkarin ni 23.5.2014 khan Union Ministry of Urban Development ah DPR thehlutin, ni 8.10.2014 vek khan a sakna tur Rs.2268.43 lakhs a rawn santion a. A enkawltu tur Nodal Agency chu Urban Development & Poverty Alleviation (UD&PA) Department, Govt of Mizoram a ni a, a satu tur hi National Buildings Construction Corporation (NBCC) Ltd. niin a satu contractor hi Balaji Developers an ni. Thla 32 chhunga zo tura ruahman niin, a plot area hi 22886.13 Sqm a ni. Stadiumah hian football ground FIFA Standard phullem phah a ni ang a, 8-lane synthetic running track siam a ni bawk ang. Heng bakah entu mi 1500 thutna tur gallery, VIP mi 100 enna tur hmun leh gym, boxing, mipa leh hmeichhe tan a hranin players’ room, 2 wheelers 200 tan leh motor te 50 tan parking-na hmun te leh inthiarna hmun 8 siam a ni bawk dawn a ni.
