Nimin khan Ailawng khua chuan an khaw kum 100 tlin lawmna hun Government Deputy Chief Whip Pu Lalrintluanga Sailo, bialtu MLA ni bawk hovin Khuangchera Runah hun an hmang.

Government Deputy Chief Whip Pu Lalrintluanga Sailo chuan Ailawng khaw centenary lawmpuina thu sawiin he hun hlimawm tak an lawm mek hian an thinlungah chona thar siam se a duh thu a sawi a. An khua in kum 101 an rah tanna turah hian kawng tinrengah hmasawn tuma rilru thar pu tura fuihin mihringin kan thei a ni tih ngaihtuahna kan put chuan thil harsa pawh kan hlen chhuak thei thin, a ti. Pu Lalrintluanga Sailo chuan sawrkarin hmasawnna hna a thawh mek leh hmachhawp te a sawi lang a. Nakum maiah kawngpui zauh hna thawh a nih tur thu te leh Dihmunzawl atangin lei hipna gravitation hmangin Ailawngah tui lakluh tum a nih thu a sawi a, ramin hma a sawn dawn chuan inlungrual a pawimawh a ni MLA chuan a ti. 

Ailawng khua hi Aizawl atangin 26 km a hla, Mamit District a awm a ni a. He khua hi kum 1920 February ni 8 ah an luah tan a, tun dinhmunah hian in 152 awmin mihring 735 an cheng mek. Ailawng khua hi Mizo pasaltha huaisen Khuangchera khua a ni a. Mizorama puk hmingthang ber zinga mi Khuangchera puk bakah Lunglei Puk, Thawmpawnga Puk, Sakei Suk, MNF Puk, Laldenga Puk tih te a awm a ni.

Centenary lawmna programme hman rual hian Government Deputy Chief Whip Pu Lalrintluanga Sailo chuan Community Based Environment and Ecotourism Development Project a hawng nghal a. Cheng nuai 100 senna he project in a tum ber chu Ailawng khaw chhehvel ram ngaw humhalh, zinmite hip leh Ailawng khaw mipui tana eizawnna siamsak a ni. January ni 25, 2019 ah hna bul tan niin he project huamchhungah hian Khuangchera hriatrenga lung chei that te, gallery cum cafeteria sak te, motor park na siam hna te, nauban huan cheibawl,  cable foot bridge leh tracking route siam te a tel a ni. Visitor information centre sak mek niin 3D Theatre te pawh dah tum a ni a. He project kaltlang hian Ailawng Khaw mi thenkhat ten Sikkim-ah khual chhawn dan training of hospitality of ecotourism an zir a ni.

Centenary lawmna programme hi Centenary Organising Committee Chairman Pu Lalthlamuana'n a kaihruai a. An khaw chanchin leh centenary lawmna tura an inbuatsaih dan te ngaihthlak a nih bakah zaithiamte nen hun hmangin, centenary lawmna ruai an theh bawk a ni.