All India Radio, Aizawl chuan vawiin khan Hmarchhak huap tualchhung rimawi kut ‘North East Traditional Music Festival’ chu Vanapa Hall-ah an buatsaih a. He Kut-ah hian Hmarchhak state – Assam, Arunachal Pradesh, Manipur, Meghalaya, Mizoram, Nagaland leh Tripura atang tein cultural troupe an rawn an telin an tualchhung rimawi te tumin, an hla sain an hnam lam hmuhnawm tak tak te an entir a ni.
He Kut hmanpuitu Hmarchhaka AIR hotupa Pu C. Lalrosanga, Addl. Director General chuan ‘Kut’ neih chhan te sawiin tualchung rimawi te ngaihhlut a tul thu a sawi. Hmarchhaka zai leh lam hrang hrangte AIR-in tapes an neih chu digital archives a vawn that mek a ni a, hei hian Hmarchhak hnam ziarang khawvelah a phochhuak thei dawn a ni, a ti. Kut hian Hmarchhak a hnam hrang hrang te inkara inunauna tha leh leh inlainat tawnna thuk zawk a siam ngei a beisei thu a sawi bawk a ni. Pu Dilip Mayengbam, Head of Programme, AIR Aizawl chuan he programme hi a vawikhat neihna a nih thu sawiin Sikkim tih loh state dang hla tak tak atanga zaithiam an tel thei chu lawmawm a tih thu a sawi bawk.
