Vawiin khan Mizoram Governor Pu Vakkom Purushothaman chuan National Council of Churches in India (NCCI) kum 100 tlin lawmna programme Hmarchhak pual bik a neih ‘North East India Celebration of the Centenary of National Council of Churches in India’ tih chu Synod Conference Centre ah a hmanpui.
Governor chuan NCCI in kum 100 a tling chu a lawmpui thu sawiin heng kum 100 kalta a India ram a Kristian te inthlunzawmna pawl lian ber chuan mi maktaduai 14, Kohhran 30, Regional Christian Council 17, ram pum huap Kristian pawl 17, agency 7 leh autonomous body 3 a huam thei hi thil ropui tak a ni a ti. Sakhaw zalenna ram a kan awm hi kan zavaia vanneihna kan neih a nih bakah ram Dan puiin mitin tan sakhaw zalenna a pe a ni.
Sakhaw tin zirtirna chu hrang mahse sakhaw tin hian hmangaihna, inunauna, remna leh muanna, mite tana inpekna leh midangte tana malsawmna nih hi a zirtir vek a ni.India rama Kristian sakhua AD 52 atanga a rawn thanchhoh dan chanchin sawiin Kristian Missionary te rawngbawlna avangin zirna, hriselna leh kawng dang tam takah hmasawnna a rawn thlen nasa a, Kerela ram ah chuan Maharaja hun lai chuan mihnuaihnung te chu sikul kai phal loh a ni a. Amaherawh chu Kristian Missionary te hian heng mite tan hian zirna kawng hawng in an tan nasa takin zirna kawng ah rawng an bawl a ni.
Mizoram ah chuan khawtlang nuna thawh hlawk ber chu kohhran a nih thu sawiin kohhran in a mite tana hna a thawk dan a bik takin fahrah leh nauhnuchham te kohhran in a enkawl dan hian a rilru a khawih takzet thu a sawi. Kristian tan chuan khawvel pum hi Mission field leh mihring mamawh tinreng chu Missionary hnathawh zelna tur nia a ngaih thu a sawi.
National Council of Churches in India kal zel na turah duhsakna hlan a ni.
Zanin hian Chief Minister Pu Lal Thanhawla chuan Aijal Club-ah NCCI palaite pual in zanriah a buatsaih sak dawn a, hetah hian Mizoram Kohhran Hruaitute Committee (MKHC) hruaitute pawh sawm an ni bawk.
