1852/2023-2024

Dated Aizawl, the 12th September, 2023: Vawiin khan India thlawhna sipai hotu Air Marshal Pu SP Dharkar, PVSM, AVSM, Air Officer Commanding-in- Chief, Eastern Air Command chuan Chief Minister Pu Zoramthanga chu a pisaah a hmu a, Civil mite leh Air Force lamten an inhmantawm theih Airport leh Heliport Mizorama din dan tur an sawi dun.

Chief Minister hian Indian Airforce Eastern Air Command hotulu berin a tlawh avanga lawmthu hrilhin Mizoramah hun hlimawm tak hmang turin duhsakna a hlan a. Mizoram chhim lamah Airport tha tak, Civil leh Air Force lamten an hman tangkai theih tur awm se tha a tih thu Air Marshal hi a lo hrilh a ni. Air Marshal SP Dharkar chuan Mizoram chu a vawi khat kalna a nih thu te, mawi a tih thu leh khualzinte tan pawha tlawh nahawm tak nia a hriat thu Chief Minister hi hrilhin, tun tuma Mizoram a rawn kal chhan ber chu India hmar chhak venhimna tihchak zel nana Mizorama Airport tha Heliport nei tel, Helicopter engemawzat chhawp theihna siam na tur hmunhma tha a awm leh awm loh rawn enfiah a nih thu a sawiin, chutiang tur hmunhma a awm a nih chuan theihtawp chhuaha tihhlawhtlin ngei a tum tur thu a hrilh a ni. Chief Minister chuan chutiang atana hman theih tur hmunhma chu hmun hnihah an hual thu Air Marshal hi a lo hrilh a, Air Marshal hian a rang lama a bawhzui nghal tur thu Chief Minister hi a hrilh nghal a ni. Airport thar neih dan tur chungchang bakah hian ram venhimna atana Mizorama hmalak tulna hrang hrang te an sawi dun bawk.

Air Marshal hian vawiin hian an hmunpui Shillong atangin Mizoram hi a rawn thleng a, Chief Minister a hmuhnaah hian Air Force Officer pawimawhten an rawn telpui a ni.