1853/2023-2024

2023 Mimkut thla ni 12: Vawiin khan Kolasib District Information & Public Relations Officer thar Pu C. Lalhruaitluanga chuan a office chamber-ah Mizoram Journalists' Association (MJA), Kolasib District member-te nen inhmelhriat nana thingpui in hona leh inkawm hona hun a buatsaih.

Kolasib DIPRO thar Pu C. Lalhruaitluanga chuan District MJA member-te'n amah an lo dawnsawn danah lawm thu sawiin, Information & Public Relations Department leh MJA te'n thawh hona ṭha tak an neih ṭhin chu chhawm nun zel a nih a beisei thu a sawi a. Sawrkar hma lakna hrang hrang puanzar kawngah te, mipuite hnena zirtirna ṭha theh darh kawngah leh ram siam ṭhatna kawnga rawtna ṭangkai chhawp chhuah kawngah te chanchinbu mi leh thu thar theh darhtute chu hmanraw pawimawh ber pakhat an nih thu sawiin, an rawngbawlna chu ṭhahnem ngai taka kalpui zel turin a chah a. Tunlaia social media hman dik loh tam em em chu veiawm a tih thu sawiin, MJA member-te chu social media hman chungchanga mipui zirtir leh kaihhruai chu an mawha la tel turin a chah a. Kawng hrang hrangah amah finchhuah a, thurawn pe ṭhin turin MJA member-te chu a ngen bawk.

He inkawm honaah hian District MJA te hi an President Pu Andrew Vanlalauva'n a ho a. DIPRO thar lawmna thu sawiin, anmahni ho khawm a, thawhpui zel turin a ngen a. District MJA hma lakna hrang hrang tar langin, Kolasib District chhunga sawrkar hna thawh leh mipui nghawng harsatnate a hmuna tlawha an enfiah ṭhin thu te, chu chuan thuneitute leh mipui beng thleng a, hma lakna chak zawk a awm phah ṭhin thu leh hma lakna tharthawh a nih ṭhin thu a sawi a. Press tour leh project site visit te chu thil ṭangkai tak nia a hriat thu a sawi.

He inkawm honaah hian District MJA Member Pu Pc. Lalṭhazuala chuan Pathian hnena ṭawngṭaina hun a hmang a. Mimal inhmelhriattirna hun hman a nih bakah, ram leh District tana thawh hona tura thil pawimawh hrang hrang sawi ho a ni a. Sawrkar office-te'n chanchinbu kal tlanga advertisement an tihchhuah chungchangah sawrkarin chhuah man (rate) a bituk leh chhuah dan tur a siam anga display leh classified-a chhuah tur chi a dik taka kalpui ṭha an tih thu sawiin, advertisement tur ang chi advertisement atana pek a nih zel theih nan leh I&PR Office kal tlang lova advertisement pek a awm loh nan a theih ang anga hma lak ni se, an ti bawk.

Tun dinhmunah Kolasib District-ah hian MJA member 14 awmin, sawrkarin accreditation a pek prominent press representative 1 leh accredited journalist 13 an awm a. MJA member-te hi print media leh electronic media lama inhmang ni hlawmin, tunah hian Kolasib District chhungah MJA member-te enkawl khaihlak lova chanchinbu chhuak 7 a awm mek a ni.