1851/2023-2024

Aizawl, the 12th September, 2023: Aizawl Smart City Limited (ASCL) hnuaia zirna in te tih changtlunna tur project, Smart Classroom kaltlanga ngaihtuah hmanraw hrang hrangte chu vawiin chawhma dar 11:30 khan Govt. Aizawl College, Mualpui Campus-ah Deputy Chief Minister Pu Tawnluia, UD&PA Department changtu Minister ni bawk chuan Aizawl khawpui chhunga zirna in hrang hrangte'n tangkai taka an hman turin a hlan.

Deputy Chief Minister Pu Tawnluia chuan Department naupang tak UD&PA chu khawpui hmasawnna leh mamawhte ngaihtuaha hma la tura din a nih thu a sawi a. Khawpui tih mawi, tih thianghlim, tih hrisel leh tih changkan kawngah theihtawp a chhuah thin thu a sawi a. National Smart Cities Mission chu India rama khawpui 100 thlan chhuahte tih hmasawnna tur project kum 2015 a hawn a nih thu leh kum 2017 ah Aizawlah pawh kalpui tan a nih thu a sawi a. Smart Cities Mission hnuaia hmalakna kalpui turin kum 2017 ah Aizawl Smart City Limited din a nih thu tarlangin, hripui leng avanga hun engemawchen hmalak a khaihlak hnuah theihtawp chhuah chhunzawm a ni a, tun dinhmuna project 40 chuang thawh a ni thei hi a lawmawm hle a ni, a ti bawk.

Sawrkarin thalaite hmakhua ngaia theihtawp a chhuah thu leh hmanraw tha zawk nena ke an pen theih dan tur chu a ngaih pawimawh thu tarlangin, Aizawl Smart City Limited hnuaia Smart Classroom Project kalpui chu phurawm a tih thu a sawi a, hei hian thiamthil zir leh zirna tih hmasawn kawngah zirlaite leh zirtirtute nasa takin a pui thei dawn a ni, a ti a. Infiamna kawngah pawh hmalak niin, Aizawl Smart City Limited kaltlangin hmun 6 ah Astro Turf phah hna kalpui mek a ni, a ti bawk a. A enkawl Department UD&PA chuan bawlhhlawh khawnkhawm, paih, sawngbawl leh dehral kawngah theihtawp a chhuah thu leh khawpui bawlhhlawh tam tham tak buaipui chu hna hautak tak a nih thu a sawi a. Solid Waste Management Centre (SWMC) din nan Sawrkarin cheng vaibelchhe 50 a dah thu sawiin, Hualngohmun, Tanhril, Sihphir bakah District Hqrs-ahte din tuma hmalak mek zel a ni, a ti a. Damdawi in bawlhhlawh a bika sawngbawl tura hmalak a nih thu a sawi bawk.

Pu Tawnluia chuan sawi chhunzawmin, mipui vantlang nun siam that leh eizawnna ngelnghet siam kawnga hmalakna SEDP chu ram leilung behchhana hmalakna a nih thu leh dawmkan ngaite puitu a nih thu a sawi a. Kalkhawmte chu khawvel hmasawn leh changkang zelah faina leh thianghlimna ngai pawimawh deuh deuh turte, hnam ziarang leh nunphungte thlahthlam lova chawinung zel turte, tanpui ngaite leh dinhmun chhe zawka dingte kalsan mai lova an tana malsawmna nih tum tlat turtein a chah a. Hmalakna thar smart classroom project chu tangkai taka hman a nih theih nan hamthatna dawngtu zawng zawngte duhsakna a hlan nghal bawk.

He hun kaihruaitu Aizawl Smart City Limited Board of Director Chairman Pu Lalmalsawma Pachuau, Secretary, UD&PA Department chuan kalkhawmte lawmna thu sawiin, Aizawl Smart City Limited hnuaia project 43 kalpui zinga 10 te zawhfel tawh a nih thu leh project 33 te thawh mek a nih thu a sawi a. Aizawl Smart City Limited hnuaiah hnathawhna tur sum cheng vaibelchhe 513 hmuh a nih thu leh sector 13 ah smart city project kalpui a nih thu a tarlang a. College, Public leh YMA Library tihchangtlunna tur New Age Learning Center pawh hmun thenkhatah siam tum a nih thu a sawi bawk.

Thusawitu dang Higher & Technical Education Director Pi Sangchhin Chinzah chuan Department aiawhin lawmthu a sawi a. Information & Technology stage a awm kan nih tawh avangin tunlai changkanna mil zela zirna kalpui thiam a ngai a ni tiin, zirtirtute chu intuaithar zel tur leh hmanraw dawnte hmang thiam thei tura theihtawp chhuah turin a chah a ni.

He hunah hian Pu C.C. Lalchhuangkima, Chief Executive Officer, Aizawl Smart City Limited (ASCL) hnen atangin Smart Classroom kalpui tur chanchin tlangpui ngaihthlak a ni a. Bungraw supplier M/s Silicon Infotech Pvt. Ltd atangin smart classroom bungraw thar hman dan tur inhrilhhriatna neih a ni a. Pu C.Lalthanzira, Addl. SPD, Samagra Shiksha, School Education Department hnen atangin thusawi ngaihthlak a ni bawk a. Pu Lalbiakzuala, Principal, Govt. Aizawl College-in lawmthu sawiin hun hman a khar a ni.

Smart Classroom Project hi School Education Department hnuaia Aizawl khawpui chhunga zirna in 94 tan smart classroom 116 leh Higher & Technical Education hnuaia zirna in 14 tan smart classroom 109, avaiin zirna in 108 ah smart classroom 225 siam a ni dawn a. Interactive Board (Interactive Flat Display Panel) 75 inches a hlai, 3KVA power back up kengtel dah a ni dawn a. Heng bakah hian Govt. Primary School 121 te Computer, Printer leh a kaihhnawih dangte pek an ni dawn bawk a ni.

Aizawl Smart City Limited (ASCL) hnuaia hmalakna pakhat Smart Classroom Project atan hian project senso zat chu cheng vaibelchhe 7.43 a ni a. M/s Silicon Infotech Pvt. Ltd chu supplier niin August ni 16, 2023 khan inremna siam a ni a, September ni 30, 2023 ah chuan Smart Classroom hmalakna hi peihfel vek tawh tura ruahman a ni.