1850/2023-2024

2023 Mimkut thla ni 12: North Eastern Electric Power Corporation Ltd (NEEPCO), Tuirial Hydro Electric Project, Kolasib te chuan vawiin khan Corporate Social Responsibility (CSR) kal tlangin Manipur aṭanga sahimna zawnga Kolasib District-a lo tlan lut (internally displaced person)-te ṭanpuina atan ₹ 1,00,000/- (cheng nuai khat) chu Kolasib District Bawrhsap Pu John LT Sanga kutah an hlan.

Kolasib DC Office chamber-a thilpek inhlannaah Kolasib Bawrhsap Pu John LT Sanga chuan NEEPCO te chu Kolasib District mipuite tan an lo luan chhuah fo tawh thu leh DC kal tlanga District hmasawnna leh mipui mamawh phuhrukna tur thil tih an neih fo thu sawiin, tun ṭuma District Administration aṭanga ngenna ngai pawimawha Manipur aṭanga sahimna zawnga lo tlan lutte tana an luang chhuak leh chu lawmawm a tih thu a sawi a. NEEPCO hotute hnenah lawm thu a sawi rualin, District Administration nena an thawh hona ṭha tak chu chhawm nung zel turin a sawm nghal bawk.

He hunah hian Bawrhsap hi Kawnpui Sub-Divisional Officer (Civil) Pu Cheemala Siva Gopal Reddy leh Kolasib District Information & Public Relations Officer Pu C. Lalhruaitluanga te'n an ṭawiawm a. NEEPCO, Tuirial HE Project te hi an Head of Project Pu Abhijit Deb-a'n hovin, ṭanpuina pawisa hi a cheque-in DC kutah hian an hlan a ni.

Kolasib District hi Manipur aṭanga sahimna zawnga lut tamna ber District niin, tunah hian Kolasib District chhunga relief camp 13-ah IDP chhungkaw 207 (mi 983) an awm mek a. Relief camp pawn lamah mahni chhungte bel leh in luaha khawsa chhungkaw 775 (mi 2,677) an awm bawk a. An zavaiin Kolasib District chhungah Manipur aṭanga tlan lut chhungkaw 982 (mi 3,660) an awm mek a. Anmahni chhawmdawlna leh tuamhlawmna atan hian sawrkar chuan theih tawpin hma a la reng a ni.