1849/2023-2024

Vawiin khan Mizoram Khadi & Village Industries Board (Mizoram KVI Board) office building thar MINECO, Aizawl ami chu Commerce & Industries Minister Dr. R. Lalthanglaina’n a hawng. KVIB office building thar hawnnaah hian ZIDCO Chairman Pu Lalthlengliana, Industries & Commerce Development Board Member-te bakah sawm bikte an tel a ni.

Hawnna inkhawm Mizoram KVI Board Chairman Pu Lalthanliana kaihhruaiah Khuallian Commerce & Industries Minister Dr. R. Lalthanglaina chuan thusawiin kum hnih chhung Covid-19 hripui leng leh harsatna hrang hrang hmachhawn hnuah pawh a taka hmasawnna thil hmuh tur awm thin hi sorkar leh mipuite tan a lawmawm takzet a a ti a. KVI Board Office tha tak, hun reiloteah sak zawh a nih theih chu a hnathawkte inpekzia leh thahnemngaihzia a tilang a, mipuite tan tangkai taka hmang ngei a nih zel turin a chah a. Mizo kutchhuak thil chi hrang hrangte pawh a zahpuiawm ta lo hlea a hriat thu sawiin Dr. R. Lalthangliana chuan sorkar hna chauh ni lovin mahni themthiamna leh talent hmangin tunlai khawvelah eizawnna tling thil tam tak a awm tawh a, hengte hi awmze nei leh eizawnna tlaka siam turin KVI Board chu a tihpuiltin saktu an ni thei a ni tiin duhsakna a hlan a ni.

Mizoram Khadi & Village Industries Board hi Mizoram Legislative Assembly in Statutory Board ni turin kum 1986 ah a din a ni a. Office atan hian mimal in luah hawh a ni thin a, Mizoram sorkarin MINECO-ah office hmun tur a pek avangin, mimal in luah hawh lo turin office tur semi-pucca leh Assam type Building-in sak a ni a. Kum 2007-ah MINECO ah insawn niin, MINECO-a sorkar office awm hmasa ber pawl a ni.

Mizoram KVI Board Office Building luah lai chu a chhiat tak em avangin Mizoram sorkarah building sakna tur dil thin a ni a, Mizoram sorkarin an mamawhna hriain kum 2021 December thla tawpah Special Assistance to States for Capital Investment (SASCI) Scheme atangin ‘Construction of Skill Training Centre Building for Mizoram KVI Board’ atan cheng nuai 500 chu a pe ta a ni. He Building sakna hna hi Department hotute ruahmanna leh enpuina hnuaiah July, 2022 ah sak tan a ni a, Sorkar atanga sum hmuhte renchem taka hmangin chawl miah lovin thla 13 chhungin sak zawhfel a ni.

Tun dinhmun a Mizoram KVI Board a Officer leh Staff awm zat chu hetiang hi a ni :

Group A Officer = 11
Group B = 52
Group C = 32
Group D = 24
Contract Employee = 5
Provisional Employee = 10
Total Employees = 134

MKVIB hnathawh pawimawh langsar zualte chu :
1) Mimal leh Society te Loan leh tanpuina awm thei ang pek a eizawnna siam sak.
2) Training Centre din a, a tui mite Training pek leh eizawnna tlak thiam thil nei tur a puih.
3) Industry neitute thil siamchhuah hralhna ngaituah sak leh thehlar sak.
4) Mipuite mahni ke a ding thei tura zirtir leh KVI thilsiamte ngaihlu tur a mite zirtir.

Mizoram KVI Board hian Zemabawk ah Multi Disciplinary Training Centre (MDTC) a nei a, Industry Trade hrang hrang 11-ah kum tluanin Training pek thin a ni. Khadi leh Village Industry atanga thilsiam chhuahte hralhna tur Sales Emporium Aizawl leh District 5 ah hawn a ni. District 6-ah District Office hawn a ni a, PMEGP Loan dilna bakah Industry din tura harsatna neite tan pan theih reng an ni.