744/2023-2024

Aizawl, the 9th June 2023 : Vawiin khan Aizawl SP Conference Hall-ah hriselna kaihhnawih Sawrkar Laipui scheme Anemia Mukt Bharat (AMB) leh Surakshit Matritva Aashwasan (SUMAN), Aizawl District chhunga bawhzui a nih dan te, hmalak tawhna leh hmachhawp te thlirho a ni a. Aizawl DC charge la tu Additional DC Pu Lalrinzuala kaihhruaiin hun hman a ni.

Anemia Mukt Bharat (AMB) in a tum ber chu naupang te, tleirawl te leh hmeichhia naupai rual (kum 15-49 inkar), raipuar leh nu hnute pe laite zingah kum tina thisen tlakchham - anemia 3% a tihhniam a ni. He hmalakna hi March 2021 khan Mizoramah kalpui tan a ni a. DC kaihhruaiin district huap meeting hmasa ber hi September 21, 2021 ah neih a ni. Vawiin thutkhawmah hian AMB hmalakna kalpui dan leh ruahmanna an siam tawh te inhrilhhriat a ni a. IFA (Iron Folic Acic) mum leh tui (syrup) sem te, rulhut damdawi sem te, a tam thei ang ber thisen test (HB test) kalpui te, thisen tlakchham laka inven dan tur inzirtirna uar taka kalpui te, department hrang hrang nen thawkhoa hmalakna kalpui te, State leh District Anemia Mukt Bharat Unit din te a tel a ni. IFA damdawi te hi Sub-Centre, Anganwadi Centre leh sawrkar leh private school kaltlang te a sem thin a ni a. IFA damdawi semchhuah tur khaihhlak deuh awm thin chungchang meeting-ah sawi lan a ni a, inzirtirna zau zawk kalpui dan tur te leh a dawng tur ten a hun taka IFA damdawi an dawn theih dan tur ngaihtuah ho a ni. Manipur leh Myanmar atanga raltlan te tan pawh heng damdawi te hi sem tum a nih thu meeting ah hian ngaihthlak a ni bawk.

Surakshit Matritva Aashwasan (SUMAN)-in a tum ber chu nu nau chunga thi leh nau pianghlim thihna tih tawp a ni a. October 10, 2019 ah kalpui tan niin SUMAN scheme hnuaiah hian nu leh nausen te tana sawrkar scheme hrang hrang te chhung khawmin sum sen ngailo a health care tha tak an dawn theihna tur duan a ni. He scheme hnuaiah hian Public Health Facility (sawrkar damdawi in leh clinic) ah te raipuar, nau nei leh nau nei hlim inenkawlna a thlawnin a dawn theih a. Heng bakah hian naute him tak leh hrisel taka a pian theih nan leh nu nau nei hlim te hriselna atana inenkawlna chi hrang hrang a thlawnin a dawn theih a ni.

DC Level Maternal and Child Death review meeting neih zui nghal a ni a. Aizawl East District huamchhungah hian nu nau chunga thi Maternal Mortality Ratio (MMR) hi 75 a ni a. Mi nuai khat zela chhutin 75 an thi tihna a ni. Nuai khat zela nausen pianghlim thi zat Infant Mortality Ratio (IMR) hi 9 a ni. Maternal and Child Death review meeting-ah hian case hrang hrang report a ni a. Nu naupaiin inenkawlna tha an dawn a tul em em laiin sakhaw pawm dan danglam neih avanga inenkawlna dawng duh lo an awm tih te, a hun taka damdawi in pan nachang hriat loh vanga thihna thleng te a awm tih hriat a ni a. Nu leh nausen an hrisel theih nan leh hetiang thihna rapthlak tak hi a thlen tawh loh nan uar zawka zirtirna kalpui a, an harsatna te zir chian a, inhrilhfiah ni se, nasa lehzuala tan lak ni se, tiin meeting hian a rel a ni.