743/2023-2024

Champhai, the 9th June, 2023: Mizoram Cooperative Apex Bank (MCAB) Chairman Pi T.Lalmuanpuii chuan tukin dar 8:00 khan Champhai Vengthlang, Tuipui Bazar-ah Apex Bank ATM Booth thar mipui hman theih turin a hawng.

Hawnna puala hun hman Pu Lalbiakdika, Manager MCAB Champhai Branch kaihhruaiah Pi T.Lalmuanpuii chuan Apex Bank hmasawnna hrang hrangte tawifel taka tarlangin, Apex Bank chu Mizo Bank a nihna ang taka mipuite'n neitu thinlung pua dawr zel turin a sawm a. Tawng dang hre lote'n mahni inring tawk tak chunga an hman ngam tur ATM Booth a ni chu lawmawm a tih thu sawiin, Mizo tawng ngeia inziak Apex Bank ATM Booth, Champhai Vengthlang Tuipui Bazar ami chu tangkai taka mipuite'n an hman theih nana duhsakna hlanin a hawng a ni.

Apex Bank hian Mizoramah ATM 27 an nei tawh a, ATM te hi Branch hnaih ber te'n an enkawl thin a ni. ATM hman awlsam leh hman nuam tak, Mizo tawng leh English a inziak ATM hi India leh khawvela ATM hman tlanglawn ber siamtu NCR Company siam a ni.