742/2023-2024

2023 Nikir thla ni 9: Mizoram Sawrkara Higher & Technical Education (H&TE) Minister Dr R. Lalthangliana chuan tukin zingkar khan Government Lawngtlai College (GLTC) tlawhin, College dinhmun a enfiah bakah, thawktute nen College hmasawnna tur hrang hrang an sawi ho.

H&TE Minister hi Mizoram Legislative Assembly Deputy Speaker Pu H. Biakzaua, LADC-a Executive Member Pu C. Hrangṭhianga leh party hruaitute'n an ṭawiawm a. Government Lawngtlai College Principal Pu JS Fanchun hovin thawktute'n lo dawngsawngin, an dinhmun, an mamawh leh harsatna te a hnenah hian an lo thlen a. Minister chuan College hmunhma fang kualin, PMJVK aṭanga College Auditorium sak mek chu a enfiah a. GLTC thawktute nen College tihchangtlunna tur hrang hrang an sawi ho nghal bawk.

H&TE Minister chuan Mizorama zirnain hma a sawn a, zirna hmunhma leh hmanruate tihchangtlun a nih theih nan sawrkarin theih tawp chhuaha hma lain, zirna lama sawrkar sum sen pawh a tam hle tih a sawi a. GLTC-ah pawh PMJVK aṭangin auditorium sak mek niin, scheme hrang hrang aṭangin hmasawnna tur project dang ruahmanna pawh kalpui mek a nih thu a sawi a. Thawktu indaih lohna phuhruk turin hna ruak eng emaw zat hnawh khahna tur pawh buaipui mek a nih thu a sawi bawk.

Minister chuan Mizoram zirnain hma a sawn theih nan zirna hmunhma leh hmanrua neih ṭhat a ṭul ang bawkin zirna ṭha kalpui a pawimawh thu a sawi a. India rama zirna in leh college dangte el pha turin National Assessment & Accreditation Council (NAAC) endikna pal tlang thei tur te, ram tana mi chhenfakawm chher chhuaktu College pawimawh a nih theih nana ṭan la thar zel tur te'n GLTC-a thawktute leh zirlaite chu a fuih a ni.

Mizoram Legislative Assembly Deputy Speaker Pu H. Biakzaua pawhin hmasawnna tluantling a awm theih nan zirna chu thil pawimawh hmasa ber a nih thu sawiin, Lawngtlaia zirna tihhmasawnna tura sawrkar hma lakna chu lawmawm a tih thu a sawi a. Lawngtlaia zirna in sang ber GLTC chu tihchangtlun a nih zel theih nan sawrkar hma lakna leh hmachhawp awm sa piah lamah a ṭul anga hma lakpui zel turin Minister chu a ngen nghal bawk.