745/2023-2024

June ni 9, 2023: Green Mizoram Day 2023 chu vawiin khan Environment, Forest & Climate Change Department buatsaihin Rohrenga Hall, Sihphir Kawn Veng ah hun hman niin, Sakawrhmuituai tlangah thinphun a ni a. Chief Minister Pu Zoramthanga chu khuallian niin EF&CC Minister Pu T.J Lalnuntluanga chu khualzahawm a ni bawk.

Kumtin a June ni 11 a Green Mizoram Day hman thin chu kuminah Pathianni ah a tlak avangin vawiin hian hman a ni ta zawk a, Mizoram hmun hrang hrangah he ni pual hian hun hman a ni bawk. Kumin thupui chu "Thing phun ila, enkawl zui ang u" tih a ni.

Chief Minister Pu Zoramthanga chuan kumin Green Mizoram Day thupui chu pawimawh tiin, thing phun ah chauh duhtawk lova enkawl zui zel a tul thu a sawi. Green Mizoram Day tobul sawiin, tun hmaa Green Aizawl day hmanga thingphun runpui neih a nih thin dan te, kum 1999 atanga state pum huap tura Green Mizoram Day tia thlakin hman a nih tan dan te a sawi a. Tih dan pawh hun leh mamawhna milin thlak chhoh hret hret zel a nih thu sawiin, hun kal zelah environment thatna tur mai bakah economy tihhmasawnna tur te pawh ngaihven kawp a pawimawh thu a sawi. Ram thang zelah kan thing phun te chu a hmun a zira uluk a pawimawh thu te - khawpui chhung leh mihring chenna hnaih a phun leh ramhnuai a phun tur te thlan uluk a tul thu sawiin, enkawl zui zel pawh a awlsam phah tur thu a sawi a ni. Chief Minister chuan economy hmasawnna leh environment humhalhna hi thil tam taka inhal anga ngaih theihna lai awm mahse, ngaihtuahna uluk taka sengin, kalkawp dan zawng zel theih chu pawimawh a tih thu a sawi bawk a. Green Mizoram Day puala kumin thing phun te chu tha taka enkawl zui a humhalh a nih zel a, Mizoram hring zawk, par mawi zawk leh nuam zawk kan neih theihna tura rahbi pawimawh tak a lo nih ngei a beisei thu a sawi a ni.

EF&CC Minister leh Green Mizoram Sub-Committee chairman ni bawk Pu T.J Lalnuntluanga chuan Green Mizoram Day kum tina hman chuan hmuh theih rah tha a chhuah ngei theih nan thing phun te hi a enkawl zui naah mipui kan zavaia mawhphurhna kan lak tlan a pawimawh thu leh, environment humhalh kawnga sawrkar hmalakna hrang hrangte chu hlawhtling tur chuan mipui tawiawmna a tul thin thu a sawi. Green Mizoram Day kalpui thin dan ah pawh hma sawn zel tum a nih thu sawiin, Chief Minister thurawn anga kalphung tih hmasawn a nih dan te, tunhnai lawkah central nursery te chei that a nih dan te sawi bawkin, tunah thing tiak nuai 2 vel lak tur a awm thu a sawi a. Tiang chuan nursery dangte pawh thuamthat a chei that hna thawh mek zel a ni a ti. GMD atana Green India Mission atanga sum hmuh chu thing tiak phun tur nursery a kui nan leh tul hrang hranga hman a nih thin dan a sawi bawk. Forest Minister chuan hmasawnna, eizawnna leh kut hlei avanga ramngaw a kiam hret hret thu sawiin, chung avang te chuan boruak inthlak danglam, tui hna tlem, nungcha tlem ta, sik leh sa inthlak avanga natna leh thil dang hrang hrangte a lo awm phah thu a sawi a. Rampumah khawltlang ah te, tlawmngai pawl ang te in hma thahnemngai taka kan la tlang hi a lawmaw hle a ni, a ti a. Forest department pawhin nasa takin hma lakna neiin, zirlai naupangahte pawh awareness kalpui a nih thu te, JICA nen tangkawpa programme lian tham tak kalpui tur a awm thu te a sawi bawk.

Vawiina Green Mizoram Day puala inkhawm buatsaihah hian MLA Pu Ramthanmawia, Bamboo Link Road Board Vice-Chairman ni bawk leh Padma Shree Awardee Pi KC Runremsangi te chu a bika sawm niin an tel a. Inkhawm hi PCCF (HoFF) Pu R.K Singh chuan kaihruaiin, Pu Lalthanhlua Zathang, CF (Planning) chuan report a pe a. Inkhawm hi Pu R.S. Sinha, APCCF chuan lawmthu sawiin a khar a ni. Kangmei ven kawnga District leh khua titha bakah intihsiakna lawmman sem nghal a ni.

• District Level Fire Prevention Award chu CM Pu Zoramthanga chuan semin, lawmman latute chu hengte hi an ni:

1) Lunglei District (Citation + Rs. 50,000)

2) Champhai District (Citation + Rs. 30,000)

3) Kolasib District (Citation + Rs. 20,000)

• Village Level Fire Prevention Award hi Minister Pu TJ Lalnuntluanga'n semin, lawmman dawngtute chu:

1) Kepran khua (Citation + Rs. 50,000)

2) Samlukhai khua (Citation + Rs. 30,000)

3) North Lungleng (Citation + Rs. 40,000)

• Ramkang Awareness Video Clip siam competition lawmman sem a ni bawk a. Lawmman hi MLA Pu Ramthanmawia chuan semin, lawmman dawngtute chu hengte hi an ni:

1) Bethlehem North KTP (Citation + Rs. 20,000)

2) PYD (NEI) Aizawl East District Khawhai Bial (Citation + Rs. 12,000)

3) Vaivakhawn Branch KTP (Citation + Rs. 8,000)

Sakawrhmuituai Tlangah Chief Minister leh EF&CC Minister ho hian thingphun ho neih chhunzawm a ni a. Pu Lalnunsanga Khawlhring DFO, Aizawl Forest Division chuan thingphun kairhuaiin, ram zia mil tura thing thlan - tlaizawng, vaube, kuangthli leh ngiau te phun tura thlan a nih thu a sawi a ni.