746/2023-2024

Aizawl, 9th June, 2023 : DP&AR(GGC) leh ATI tangkawpin an buatsaih ni thum awh "Training on Sevottam For Nodal Officers of CPGRAMS" chu vawiin khan Administrative Training Institute (ATI), MINECO-ah vawiin khan khar a ni a. He training hi June ni 7, 2023 (Nilaini) khan Pu R.Lalramnghaka, IAS, Secretary, DP&AR in a hawng a, vawiin training kharna hun hi a hmanpui leh bawk a ni.

Vawiin training kharna inkhawmah hian Pu R. Lalramnghaka chuan sawrkar mi leh sa kan nih anga kan mawhphurhna kan hlen chhuah that lehzualna tura ruahmanna training tha taka neih a ni chu lawmawm a tih thu a sawi a, khua leh tui te vui leh vaina leh lungawilohna chi hrang hrang te awlsam leh rang taka chinfel sakna tur a nih avangin nodal officer te mawhphurhna a sang hle tih sawiin rinawm tak leh dik taka an hna an hlen a pawimawh tih a sawi a. Langtlang sawrkar, mipui leh sawrkar inkara hriatthiam lohna leh hriat fuh loh deuh te chingfeltu, mipui leh sawrkar inzawmna lei (bridge) pawimawh tak an ni tih hre turin nodal officer training te a chah a ni.

He training thupui keng tu ‘Sevottam’ tih hi thu mal pahnih Seva (service) leh Uttam(excellent) atanga lo piang a ni a, heng thumal pahnih hi zawmin a saptawng chuan “excellence in service” tih a ni. Mipui rawngbawlna/hnathawh tha thei ang ber pek chhuah hi a tum ber a ni.

Sevottam hi Department of Administrative Reforms and Public Grievances(DARPG), Govt of India in a duan chhuah a ni a, khawvel hmun hrang hranga kalphung leh tihdan tha a zir atanga duan a ni.

India ram chhunga sawrkar peng hrang hrang te’n an hnathawh kawngah hma an sawn zel a, a tha ber an thlen theih nan a hma lak hi a tum a ni.

Sevottam thil tum ti hlawhtling tura a hnuai a peng chi 3 awm te:

(1) Citizens’ Charter

(2) Grievance Redressal

(3) Service delivery/Capacity building

Sevottam in a tum ber chu sawrkar department te’n hna tha thei ang bera an thawh nana zirtirna pek a ni a. He tumna ti hlawhtling tur hian Citizens’ Charter hmangin mipui hnenah department hna thawh leh tih theih te tarlan tur a ni a. Department lam ve thung chuan hna tha thei ang bera thawk turin a thawktu lam nen a lo inthuam chak ve thung ang. Mipui lam hian an chanvo, department atanga an dawn tur an dawng ngei em tih an hriat nan Citizens’ Charter te an hmang tangkai anga, duh khawplohna awm ang te chu an thlen leh tur a ni ve thung a. Heng lungawilohna/mipui aw/feedback hi department chuan insiamthat nan a lo hmang tangkai anga, an lungawilohna te hi chinfel sak ngei a lo tum dawn a ni.

He training ah hian Mizoram sawrkar department hrang hrang aiawh officer (150) zet an tel a. Heng officer tel te hi Sevottam peng pakhat, mipuite’n awlsam zawk a an lungawilohna an thlen theihna leh a chinfelna hmanrua pawimawh tak Centralised Public Grievance Redress and Monitoring System (CPGRAMS) enkawl tura ruat Nodal Officer te an ni. CPGRAMS hi a hmuna kal kher zel ngai lovin online-a thuneitu hrang hrang laka lungawilohna thlen theihna a ni a. Heng lungawilohna te hi a Ministry emaw a state sawrkar kaihhnawih te hnenah thawn chhawn a ni thin a ni.