Vawiin khan ram chhung hmun dangte rualin International Day for Disaster Reduction chu Mizoram chhunga District Headquarters hrang hrangah hman a ni a. Aizawlah chuan Disaster Management & Rehabilitation (DM&R) Minister Pu C.Ngunlianchunga hovin Hotel Regency, Zarkawtah hman a ni.
Pu C.Ngunlianchunga chuan kumina International Day for Disaster Reduction thupui “In lama himna leh khawtlang a chhiatna tihnepna tura inbuatsaihna (Home Safety and Local Preparedness for Disaster Risk Reduction)” pawimawhzia sawiin chhiatna a lo thlena tuartu leh chhawmdawltu hmasaber chu a thlenna inchhungkhur leh khawtlang a ni a, chuvangin, chhungkaw tin te hian chhiatrupna a lo thlen thulha chetdan tur kan hriat theuh a tul a ni, a ti. Pawn lam atanga tanpuina lo thlen hmaa chhanchhuahna hna thawh dan leh damdawi lam thiamte thlen hma a hliam tuar inbawihsawm dan tur hi mi tam zawkin thiam a tul a, hemi atan hian sorkar chuan Village/Locality Disaster Management team din leh tihchangtlunte, heng mi te tana training leh hmanraw tha zawk pek kawngah te hma a la zel a ni, Minister chuan a ti a. Sorkar laipuiin National Disaster Response Force a din zul zuiin Mizoram sorkar pawhin Police Battallion 7-ah State Disaster Response Force (SDRF) unit company khat zel a din a, Aizawl khaw chhung leh pawn YMA branch thenkhat atangin mi 54 in training an nei mek a ni, DM&R Minister chuan a ti bawk.
Kum 1989, December 22 a UNO General Assembly chuan October thlaa Nilaini vawi hnihna hi “International Day for Natural Disaster Reduction” atan a lo rel a. Khawvel pumah chhiatrupna tih nep a tulzia chawilarna leh inzirtirna ni atan October ni 13 hi hman ni se tiin UN General Assembly 2001 a neih chuan a rel leh a, a hming pawh siam danglam hretin “International Day for Disaster Reduction” tiin an vuah a. India ram pawhin National Institute for Disaster Management (NIDM) New Delhi bul tumin kum thum kal ta atang khan hman tan a lo ni ta a, kuminah hian rampum huapin October ni 8 ah hman a ni.
DM&R Joint Secretary Pu R.S. Lalzamliana kaihhruai he programme ah hian DM&R Director Pu C.Lalpeksanga chuan thuhmahruai a sawi a, Dr. Lalrokima Chenkual, Head Faculty, ATI,DM Centre leh SDMA member Pu Dominic Lalhmangaiha te’n zirtirna pe in, sawihona hun hlawk tak an hmang zui nghal a ni.
