Vawiin khan Vanapa Hall-ah Kut Hnathawktute Ni denchhenin Kut Hnathawktute Khawmpui hman a ni a. He hunah hian Pu Lal Thanhawla, Chief Minister chu Khuallian niin, Pu R.Romawia, H&TE Minister leh Pu H.Liansailova, Vice Chairman, State Planning Board te chu Khual-zahawm an ni a. Pu Lalmalsawma, Chief Secretary-in kal khawmte lawmna thu a sawi a ni.

Khuallian Pu Lal Thanhawla, Chief Minister chuan “Mizoram Hmasawnna Lamtluang” tih DDK Programme, naktuk zan 7-8 a tihchhuah tan tur a hawng a. He programme hi kar tin Zirtawp zan dar 7-8 inkarah DDK Aizawl chuan a tichhuak thin ang. Sorkarin hmasawnna hrang hrang a kalpuite hi mipuiten chiang zawka an hriat theihna turin NLUP kaltlangin DDK, Aizawl leh Mizoram sorkarin ‘Mizoram Hmasawnna Lamtluang’ tichhuak thin turin inremna ziah a nih thu Chief Minister hian a sawi a. Chief Minister chuan NLUP hian mi rethei tam tak tan malsawmna a thlen tawh a. Rinawmna, dikna, taihmakna leh Pathian tihna nung nena kan thawh chuan kan hlawhtlinpui zel ang, a ti. “Kut hnathawh hi hna ropui leh zahawm a ni a; kan ngai ropuiin kan ngaihlu tur a ni,” tiin, “Sum ngaina hnama kan chhuah loh nan kut hnathawh kan uar a pawimawh hle a ni,” a ti a. Democracy-ah mipui leh sorkar thawh hona tha a pawimawh a, chuta tan chuan inpawhtawnna tha neih a tul a ni a ti.

Chief Minister chuan Mizote hi hnam ropui leh zahawm, ei leh bar bakah sum leh paia intodelh ni turin a kalkawng tur sorkarin a ruahman vek tawh a, a hlawhtlinna tura theihtawp chhuah turin kan zavaia tan kan lak a ngai a ni a ti a. Kut hnathawktute thar chhuah hralhna turin sorkarin a phak tawkin ngaihtuahna a hmang reng a ni tiin, economic policy leh kalphung thar hman theih dan a ngaihtuah mek a ni a ti. Kan economy hi market economy a hlan kai dan kan ngaihtuah reng a ni tiin, kut hnathawktute chawimawi an nih theih nan a ti tha zualte tan lawmman pawh siam tum a ni a ti.

Pu PL Thanga, SPB-a Member Secretary leh NLUP Implementing Board Vice Chairman ni bawk chuan kum 5 pumhlum NLUP kalpui a nih hnua a kum 6-na Birthday lo thleng hi malsawmna tam zawk kan hmuh theihna tur a nih a beiseiawm hle a ni tiin, Phase-I kha inbuatsaihna a ni a, Phase-II hi chu a rah seng hun niin, harsatna neuh neuh avanga tum aia muanga NLUP kalpui a ni pawh malsawmna zawk a nih thu a sawi a. Siam that ngai laite siam that mek niin, hlawhtlinna duhawm takin min hmuak mek a ni a ti bawk. Hna thawktute leh Line Department-te inpawh tlang taka an thawh ho a pawimawh thu sawiin NIB Vice Chairman chuan, “NLUP hian ‘Zoram khawvar thar’ a hring ngei dawn tih hi rin thu mai ni lovin, a tak ngei a ni,” a ti a. “Siam that ngai siam that nan kan chawl hret a; tunah hian zo thawkhat tawhin, kan chhunzawm leh thuai dawn a ni,” a ti bawk.

Khual-zahawm Pu H.Liansailova, Vice Chairman, SPB pawhin thu sawiin, “Roreltute chu rethei, pachhia leh hmeithaite tana ding tur an ni tih Bible-in chiang takin min hrilh a. Chu chu kan hotute hian an zawm tha hle a ni,” tiin, “NLUP hi khawpuiah aiin thingtlangah a hlawhtlinna a sang zawk a; a pumpuiah 44%-a hlawhtlingin, lo neitute’n theihtawp an chhuahna apiangah a hlawhtlinna pawh a sang zel a ni,” a ti bawk. NLUP atanga malsawmna hi Pathianin ram tana malsawmnaah a ruat a; chu vang chuan tihhlawhtlin loh chu ‘Corruption’ a ni tiin Khual-zahawm chuan, “NLUP-ah hian thil tha hlir kan khung khawm ta a ang viau a ni,” a ti bawk.

Prof. R.Lalthantluanga, Vice Chancellor, MZU chuan Minnesota University, USA te nena thawh hona neih report a pe a. “He thawh hona hian hlawk zawk leh tha zawka lo neih dan ngaihtuah te, Mizoram thil eizawn nana tangkai tur dap chhuah leh buh leh thlai thar chhuahte man man zawka hralh dan tur ngaihtuah te a huam a ni,” a ti.

Pu Rinzuala, UN Programme Coordinator chuan UN Agency-te leh Mizoram sawrkar thawh hona chungchang report a pe a. “He thawh hona hi ‘UN Joint Initiative in Mizoram’ tih niin, India rama a hmasa ber a ni a. He thawh hona hian hlawk zawk leh tha zawka thil thar chhuah dan tur leh hralh chhuah dan tur te, Mizo thalaite skill develop-na tur te, sawrkar thuam chakna tur leh sik leh sa leh ramngaw humhalh kawnga tan lakna tur te a huam a ni,” a ti.

Khual-zahawm dang, Pu R.Romawia, H&TE Minister pawhin kut hnathawktute chawimawiin awm zel se a duh thu sawiin, sorkar hma lakna hrang hrang a sawi lang bawk.

2nd Session-ah kut hnathawktute nena inkawm hona hun hmangin, Prof. Lianzela, MZU kaihhruaina hnuaiah NLUP chungchang sawi hona leh zawhna leh chhanna hun hman a ni bawk.