Social Welfare Dept. bul tuma sak Cheng nuai 368 senna Scheduled Tribe Girls Hostel, Pukpui-a mi chu vawiin khan Pu Pc Lalthanliana, Minister i.e. Social welfare, etc. chuan a hawng.

Hawnna inkhawm Pu Lalthangpuia Sailo, Secretary, Social Welfare Dept. kaihhruaiah khuallian Pu Pc Lalthanliana chuan thu sawiin, he building hi BCM zirna sang HATIM hman tur a ni a, kohhran hi zirtirna lamah sul sutu ber an ni a, chu vang chuan sorkar, kohhran leh tlawmngai pawl hi kan thawh ho a ngai a ni a ti. Social Welfare Dept. hi Central-ah pawh Ministry pasarih nen thawh hona an nei a, tunah chuan Mizo mipuite leh kohhrante pawhin tangkai takin kan hmang tawh a ni a ti.

Vawiina hawn tak Tribal Girls Hostel hi Pukpui-a BCM ram HATIM College hmuna sak a ni a, HATIM-a zirlai hmeichhiate’n an hmang tangkai hle dawn a ni.

Vawiina hawn tak Tribal Girls Hostel hi eng emaw chen chu Social Welfare Dept enkawlna hnuaiah a awm rih ang a, remchangah BCM kutah hlan a ni dawn a ni. Hostel hawnna inkhawmah hian Pi Chawngthanpari, Principal, HATIM leh Rev. C Ngurhnema te pawhin thu an sawi a ni.