NLUP Implementing Board huaihawt Kuthnathawktute Khawmpui 2016 chu vawiin khan Saitual Auditorium ah neih a ni a, Home Minister Pu R.Lalzirliana’n a hmanpui.

Khuallian Pu R.Lalzirliana chuan thusawiin vawiin Kuthnathawktute Ni kum tina hman thin chu kuthnathawktute pualin, mi rethei leh tanpui ngai ten ei leh bar zawnna kawnga hmasawnna an neih theih nana inzirtir tharna ni ah hman thin a nih thu a sawifiah a. Kuthnathawktute chu Mizoram economy ruhrel siamtu pawimawh tak an nih avangin mipui ten kan dah pawimawha kan hlut thiam a tul tak zet a ni, a ti. Mi retheite chawikanna tur NLUP hmalakna te chu sawrkar hnuaia mi ni lo, pawnlam mi NABARD hnuaia NABCONS ten uluk taka an endik thin thu te sawiin Minister chuan Mizoram puma thlirin NLUP hmalakna te chu 46% velin an hlawhtlinpui dawn nia a lan thu te a sawi lang bawk. NLUP buaipuitu line department officials te chuan tha tak leh sawisel tur awm lova an mawhphurhna te an hlenchhoh zel avangin lawmthu a sawi a, NLUP hlawhtlinna chu sawrkar hlawhtlinna ni mai lova mipui hlawhtlinna a nih zawk thu te a tarlang bawk. NLUP tanpuina dawngtute chu mahni tana thawk an ni tih hre reng tura fuihin beneficiary thatchhia leh inthlahdah te tan sum a awm loh thu te a sawi lang bawk. Minister chuan NLUP hmalakna avanga lo vata ram tihchhiat a tlakhniam thu leh buh thar pawh a pun zel thu te a sawi a, NLUP kalpui zelna turin sum sanction vek tawh a ni tiin belhchian dawla thawkte chu pek chhunzawm zel an nih tur thu a puang bawk. Kuthnathawktute tel lovin kan ramin hma a sawn famkim thei dawn lo tih sawrkarin a hriat chian avangin NLUP chak takin a kalpui mek a, khawvel ram dang te pawhin rawn ngaihvenin tunah hian UN agency hrang hrang te nen pawh thawhho mek a nih thu Minister chuan a sawi bawk.

Khualzahawm Parliamentary Secretary Lt.Col. Z.S.Zuala chuan ruahmanna fel tak tel lo chuan sum hi awmze nei lovin a hman theih a ni, a ti a. NLUP chu ruahmanna fel tak hnuaia Mizoram-in hma kan sawnpui ngeina tura duan a nih thu te a tarlang a. NLUP tanpuina dawngtu beneficiaries te chuan, tanpuina sum a nih ang taka dik taka hmang tangkai theuh turin kalkhawmte chu a chah bawk. Kuthnathawktute Khawmpui programme hi Pu Donny Lalruatsanga, SDO(C)-in a kaihruai a, Dr Lalnilawma, Associate Professor, MZU, Extension Education & Rural Development Dept. leh he hun chhimtu University of Minnesota, USA zirlai pahnih te pawhin thusawina hun an hmang bawk.

Minister leh Parliamentary Secretary te hian Horticulture, Industries, Sericulture, Agriculture leh Fisheries Department hnuaia NLUP beneficiaries te hnenah tanpuina sum an sem nghal bawk a. Minister tawiawmtu Line Department Officer te chuan NLUP beneficiaries te nen sawihona hun hmangin an harsatna leh hriatchian loh lai te inzawtin an inhrilhfiah bawk a ni.