Assembly Constituency panga awmna Champhai District tana Electoral Roll 2016 ennawn chu vawiin chawhma khan Champhai District Election Officer leh DC ni bawk Pu Vanlalngaihsaka chuan DC Conference Hall-ah a tlangzarh. January ni 1, 2016 hi qualifying date a ruat niin, hemi ni thlenga Constituency panga chhunga voter awm zat chu 81,029 niin, Champhai District-ah hian mipa aiin hmeichhe voter an tam zawk a. Roll hmasa nen khaikhinin Final Electoral Roll 2016-ah hian voter punna chu mi 1,513 a ni.

DC Pu Vanlalngaihsaka chuan Election Branch a thawktute leh ERO leh AERO te thawhrimna chu fakawm a tih thu sawiin, office hun leh hunlo pawh sawi lova taima taka an thawk thin chu entawntlak a ti a. Roll punna pawh ECI in a phal chin (+4%) aia tlem daih a ni chuan ERO leh AERO te fimkhurzia a tilang a ni, a ti bawk.

Draft Roll-ah mipa 39,606 leh hmeichhia 39,910 awmin, a vaiin mi 79,516 ziahluh an ni a. Form 6 hmanga dilna hi 3,680 thehluh niin, heng zingah hian mi 2,992 chu pawmsak a ni a. Form 7 hnuaia Objection thehluh zingah 1,479 chu pawm a ni bawk. Form 8 hmanga siamthatna (correction of particulars) awmzat chu 849 a ni a. Roll hmasa nen khaikhinin Electoral Roll 2016-ah hian Champhai South Constituency-ah voter punna a tam ber a (2.53%), Lengteng Constituency-ah voter punna a tlem ber thung a ni (0.89%).

Champhai North A/C leh Champhai South A/C ah voter mipa aia hmeichhia an tam zawk a. Champhai North A/C ah hian voter 17,750 awmin an tam ber a, East Tuipui A/C ah hian voter 14,522 awmin a tlemna ber a ni thung. Tuichang A/C chhunga Vengthar Polling Station chu voter tamna ber (1,655) niin, Lengteng A/C chhunga Taitawkawn chu voter tlemna ber (50) Polling Station a ni thung.

Voter kum 18-19 hi 5,416, kum 20-29 inkar voter 24,809 awmin, kum 30-39 inkar voter 20,198 awm bawkin, kum 40 chunglam voter 30,606 an awm a ni.

Final Electoral Roll 2016 tlangzarhna hunah hian Addl. DC Pu C. Lalzarliana, Election Officer Pu Pachhunga, ERO, AERO leh BLO te bakah Political Party hrang hrang aiawhte an tel a ni.