Vawiin chawhnu khan Art & Culture Minister Pu R. Romawia kaihhruaiin NLUP Conference Room-ah Chapchar Kut Organising Committee chuan Chapchar Kut 2016 hman dan tur an rel.

Chapchar Kut Organising Committee Co-Chairman Art&Culture Minister Pu R.Romawia chuan kumin Chapchar Kut hi hlim leh lawm taka hmang turin mipuite a sawm a, kum dang aia tha, felfai leh hlimawm zawka Kut hi buatsaih a nih theih nan tan la turin Committee member-te a sawm a ni.

Kumin Chapchar Kut Organising Committee thutkhawm vawi khatna-ah hian Kut hman dan tur chipchiar taka duangtu tur Programme Sub-Committee an din a. Art&Culture Director chu sub-committee Chairman atan ruat niin committee member turte pawh ruat fel nghal a ni bawk. Organising Committee thutkhawm leh hunah Sub-Committee thuchhuak thlir ho a ni ang. Meeting-ah hian Department hrang hrang aiawhte telin mawhphurhna sem zai nghal a ni a. Ruahman lawkna ang chuan March ni 4 a hman tur Chapchar Kut lawmna pui ber hi Aizawl Sipai Lammualah neih a ni dawn a. District khawpui tinah lawmna buatsaih a ni bawk ang. Kum danga tih thin angin kumin Chapchar Kutah pawh Painting Exhibition leh Flower Show neih leh tum a ni.

Meeting-ah hian DC Aizawl, Industries, I&PR, Tourism, Horticulture, UD&PA, Fire & Emergency Services, Art & Culture, DDK, AIR, PWD, PHE, P&E, Aizawl SP, SP Traffic aiawhte bakah tlawmngai pawl hrang hrang - CYMA, MHIP, MUP, MCO, MJA leh MFA aiawhte an tel.